ଯାଜପୁର ( ଆୱାଜ ମିଡ଼ିଆ ) – ଜିଜ୍ଞାସୁ ସାହୁ : ସୁକିନ୍ଦା ଅଞ୍ଚଳରେ ଏକ କୂଅରେ ପଡିଥିବା ଭାଲୁକୁ ବନବିଭାଗ ପକ୍ଷରୁ ଉଦ୍ଧାର କରାଯାଇଛି । ସୁକିନ୍ଦା ବନ ବିଭାଗ ଅନ୍ତର୍ଗତ ସଂସାଇଲୋ ପଞ୍ଚାୟତର ନୁଆସାହି ଗାଁ ଜଗବନ୍ଧୁ ମହାନ୍ତଙ୍କ କୂଅରେ ଏକ ଭାଲୁ ପଡିଥିବା ଦେଖି ସୁକିନ୍ଦା ବନବିଭାଗକୁ ଖବର ଦିଆଯିବା ପରେ ସେହି ସ୍ଥାନରେ ଗହଳି ଲାଗିଥିଲା ।ସୁକିନ୍ଦା ଓ କଳିଆପାଣି ବନବିଭାଗ , ଦମକଳ ବାହିନୀ ସମସ୍ତେ ଲାଗି ଭାଲୁ କୁ ଉଦ୍ଧାର କରିବା ପାଇଁ ନାକେଦମ୍ ହୋଇ ଯାଇଥିଲେ । ପ୍ରାୟ ଆଠ ଘଣ୍ଟାରୁ ଅଧିକ ସମୟ ଲାଗଥିଲା ଏହି ଅପରେସନ । ଶେଷରେ ଭାଲୁଟିକୁ ଉଦ୍ଧାର କରାଯାଇଛି । ଉଦ୍ଧାର ଭାଲୁକୁ ସୁକିନ୍ଦା ବନବିଭାଗ କାର୍ଯ୍ୟାଳୟରେ ରଖା ଯାଇଛି , ସ୍ୱାସ୍ଥ୍ୟ ପରୀକ୍ଷା କରାଯିବା ପରେ ଜଙ୍ଗଲରେ ଛଡାଯିବା ଜଣାପଡିଛି । ଏହି ଅପରେସନରେ ସହକାରୀ ବନ ସଂରକ୍ଷକ , କଟକ ବନଖଣ୍ଡ ସୌଭାଗ୍ୟ କୁମାର ସାହୁ, ସୁକିନ୍ଦା ରେଞ୍ଜର ବିପିନ ବିହାରୀ ରାଉତରାୟ, ଟମକା ରେଞ୍ଜର ବଳରାମ ସାହୁ, ଯାଜପୁର ରୋଡ ରେଞ୍ଜର ଜ୍ୟୋତିରଂଜନ ମହାପାତ୍ର, ଫରେଷ୍ଟର ନରେଶ ଟୁଡୁ, ଦିପ୍ତିମୟୀ ନାୟକଙ୍କ ସମେତ ଅନେକ ବନ କର୍ମଚାରୀ ସାମିଲ ହୋଇଥିଲେ ।
