ଗଜପତି ( ଆୱାଜ ମିଡ଼ିଆ ) – ବିବେକାନନ୍ଦ ବେହେରା : ଆନ୍ତର୍ଜାତୀୟ ମହିଳା ଦିବସ ୨୦୨୬ ଅବସରରେ ଜିଲ୍ଲା ପ୍ରଶାସନ ପକ୍ଷରୁ ଏକ ଦିନିଆ କର୍ମଶାଳା ଆୟୋଜିତ ହୋଇଥିଲା। ଏହି କର୍ମଶାଳାରେ ଡିଜିଟାଲ୍ କୌଶଳ ଏବଂ ପ୍ରଯୁକ୍ତି ସାକ୍ଷରତା ବୃଦ୍ଧି, ଆଇନଗତ ଅଧିକାର ସମ୍ପର୍କରେ ସଚେତନତା ସୃଷ୍ଟି, ମହିଳା ଉଦ୍ୟମୀମାନଙ୍କ ପାଇଁ ବଜାର ସୁବିଧାର ସୁଧାର, ଆର୍ଥିକ ସାକ୍ଷରତା ଏବଂ ମହିଳା ସଶକ୍ତିକରଣକୁ ପ୍ରୋତ୍ସାହନ ଦେବା ଉପରେ ଗୁରୁତ୍ୱ ଦିଆଯାଇଥିଲା। କାର୍ଯ୍ୟକ୍ରମର ଲକ୍ଷ୍ୟ ଥିଲା ମହିଳାମାନଙ୍କୁ ସ୍ୱାବଳମ୍ବୀ ଏବଂ ଆର୍ଥିକ ଉନ୍ନତି ପାଇଁ ତାଙ୍କର ଜ୍ଞାନ ଓ କ୍ଷମତାକୁ ସୁଦୃଢ କରିବା।
ଏହି କାର୍ଯ୍ୟକ୍ରମକୁ ଏଡିଏମ (ରେଭେନ୍ୟୁ) ଉଦ୍ଘାଟନ କରିଥିଲେ ଏବଂ ମହିଳା ସଶକ୍ତିକରଣ ସମ୍ପର୍କରେ ଅତ୍ୟନ୍ତ ପ୍ରେରଣାଦାୟକ ଉଦ୍ବୋଧନ ରଖିଥିଲେ। ଶ୍ରୀମତୀ ଭାଗ୍ୟଲକ୍ଷ୍ମୀ ନାୟକ, ସଦସ୍ୟ ଜେଜେ ବୋର୍ଡ, ଶ୍ରୀ ପ୍ରମୋଦ ରାଉଳ, ପୂର୍ବତନ ଅଧ୍ୟକ୍ଷ ସିଡବ୍ଲ୍ୟୁସି, ଏବଂ ଜିଲ୍ଲା କୌଶଳ ବିକାଶ ଓ ନିଯୁକ୍ତି ଅଧିକାରୀ ଉପସ୍ଥିତ ଥିଇ ଉପଦେଶକ (ରିସୋର୍ସ ପର୍ସନ) ଭାବେ ମାର୍ଗଦର୍ଶନ ଦେଇଥିଲେ।
ଏନଏମୱାଇସିଏସ୍ (NMYCS) ଏନଜିଓ, ଯାହା ‘ଶକ୍ତି ସଦନ’ ପରିଚାଳନା କରୁଛି, କାର୍ଯ୍ୟକ୍ରମ ପାଇଁ ସହଯୋଗ ପ୍ରଦାନ କରିଥିଲା। ଓନ୍ ଷ୍ଟପ୍ ସେଣ୍ଟର (OSC) ‘ସଖୀ’ ଗଜପତି ସକ୍ରିୟ ଭାବେ ଅଂଶଗ୍ରହଣ କରିଥିଲା। ସେହିପରି CDPOମାନେ, SHG ଫେଡେରେସନ୍, ବିଭିନ୍ନ ଏନଜିଓ, ଛାତ୍ରଛାତ୍ରୀ, କିଶୋରୀମାନେ, ଆଙ୍ଗନବାଡ଼ି କର୍ମୀ (AWW) ଏବଂ ଆଶା କର୍ମୀମାନେ ଗଜପତି ଜିଲ୍ଲାରୁ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ।