ବେଆଇନ ବାଣ ଗଚ୍ଛିତ ଓ ବିକ୍ରି ବିରୋଧରେ ପାରଳାଖେମୁଣ୍ଡି ପୋଲିସର କାର୍ଯ୍ୟାନୁଷ୍ଠାନ !!!

ଗଜପତି ( ଆୱାଜ ମିଡ଼ିଆ ) – ବିବେକାନନ୍ଦ ବେହେରା : ବେଆଇନ ବାଣ ଗଚ୍ଛିତ ଓ ବିକ୍ରି ବିରୋଧରେ ପାରଳାଖେମୁଣ୍ଡି ପୋଲିସର କାର୍ଯ୍ୟାନୁଷ୍ଠାନ, ଦୁଇଟି ମାମଲାରେ Rs. ୧୪ ଲକ୍ଷରୁ ଅଧିକ ମୂଲ୍ୟର ବାଣ ଜବତ ! ବିନା ବୈଧ ଲାଇସେନ୍ସରେ ବାଣ ଗଚ୍ଛିତ ରଖିବା ଓ ବିକ୍ରି କରିବା ବିରୋଧରେ ପାରଳାଖେମୁଣ୍ଡି ପୋଲିସ ପକ୍ଷରୁ କାର୍ଯ୍ୟାନୁଷ୍ଠାନ କରାଯାଇ ଦୁଇଟି ପୃଥକ ମାମଲାରେ Rs. ୧୪ ଲକ୍ଷରୁ ଅଧିକ ମୂଲ୍ୟର ବହୁ ପରିମାଣର ବାଣ ଜବତ କରାଯାଇଛି । ପ୍ରଥମ ଘଟଣାରେ, ତା. ୧୬.୦୯.୨୦୨୬ ରିଖରେ ବିଶ୍ୱସ୍ତ ସୂଚନା ଆଧାରରେ ପାରଳାଖେମୁଣ୍ଡି ପୋଲିସ ରାଣୀପେଣ୍ଠ ରୋଡ଼ର *ଗୁମ୍ମାଗଡ଼ାଠାରେ ଥିବା ଲାଡି ରମେଶ (୫୫) ଙ୍କ ବାଣ ଦୋକାନ ଓ ଗୋଦାମରେ ଚଢ଼ାଉ କରିଥିଲା। ଯାଞ୍ଚ ସମୟରେ ସେଠାରେ ବିନା ବୈଧ ଲାଇସେନ୍ସରେ ବହୁ ପରିମାଣର ବିଭିନ୍ନ ପ୍ରକାର ବାଣ ଗଚ୍ଛିତ ରଖାଯାଇଥିବା ଜଣାପଡ଼ିଥିଲା। ବୋମା ଚିହ୍ନଟ ଓ ନିଷ୍କ୍ରିୟକରଣ ଦଳର ସହାୟତାରେ ଆଇନଗତ ପ୍ରକ୍ରିୟା ଅନୁସାରେ ଉକ୍ତ ବାଣଗୁଡ଼ିକୁ ଜବତ କରାଯାଇଥିଲା। ଏ ସମ୍ପର୍କରେ ପାରଳାଖେମୁଣ୍ଡି ଥାନା କେସ୍ ନଂ. ୩୮୨/୨୦୨୬, ତା. ୧୬.୦୯.୨୦୨୬, ଦଫା ୨୮୮ BNS ସହିତ ଦଫା ୯(B) Explosives Act, 1884 ଅନୁଯାୟୀ ମାମଲା ରୁଜୁ ହୋଇଛି। ଜବତ ବାଣର ଆନୁମାନିକ ବଜାର ମୂଲ୍ୟ Rs. ୧୨ ଲକ୍ଷରୁ ଅଧିକ। ଦ୍ୱିତୀୟ ଘଟଣାରେ, ତା. ୧୮.୦୯.୨୦୨୬ ରିଖରେ ରାଣୀପେଣ୍ଠ ଅଞ୍ଚଳରେ ପାଟ୍ରୋଲିଂ ସମୟରେ ମିଳିଥିବା ବିଶ୍ୱସ୍ତ ସୂଚନା ଆଧାରରେ ପୋଲିସ ପୁରୁଣା ରାଣୀପେଣ୍ଠ, କାଶୀନଗର ରୋଡ଼ ରେଳବାଇ କ୍ରସିଂ ନିକଟରେ ଥିବା ପି. ଭାରତ କୁମାର (୩୧) ଙ୍କ ଗୋଦାମରେ ଯାଞ୍ଚ କରିଥିଲା। ସେଠାରେ ବିନା ବୈଧ ଲାଇସେନ୍ସ ବା ଅନୁମତିରେ ବହୁ ପରିମାଣର ବାଣ ଗଚ୍ଛିତ ରଖାଯାଇ ବିକ୍ରି କରାଯାଉଥିବା ଜଣାପଡ଼ିଥିଲା। ସ୍ୱାଧୀନ ସାକ୍ଷୀଙ୍କ ଉପସ୍ଥିତିରେ ବାଣଗୁଡ଼ିକୁ ଜବତ କରାଯାଇ ଦଫା ୨୮୮ BNS ସହିତ ଦଫା ୯(B) Explosives Act, 1884 ଅନୁଯାୟୀ ମାମଲା ରୁଜୁ କରାଯାଇଛି। ଏହି ମାମଲାରେ ଜବତ ବାଣର ଆନୁମାନିକ ମୂଲ୍ୟ Rs. ୨ ଲକ୍ଷ। ଏହିପରି ଦୁଇଟି ସଫଳ କାର୍ଯ୍ୟାନୁଷ୍ଠାନରେ ପାରଳାଖେମୁଣ୍ଡି ପୋଲିସ ମୋଟ Rs. ୧୪ ଲକ୍ଷରୁ ଅଧିକ ମୂଲ୍ୟର ବାଣ ଜବତ କରିଛି। ଉଭୟ ମାମଲାର ତଦନ୍ତ ଜାରି ରହିଛି ।