ଅନୁଗୁଳ ( ଆୱାଜ ମିଡ଼ିଆ ) – ଟଙ୍କଧର ଗଡ଼ନାୟକ : ଅନୁଗୁଳ ସହର ଗାନ୍ଧିମାର୍ଗ ଗୁଜୁରାଟିପଡ଼ା ଛକରୁ ଗତ ଶୁକ୍ରବାର ଜଣେ ନାବାଳିକାଙ୍କ ବେକରୁ ସୁନା ଚେନ୍ ଲୁଟ ଏବଂ ବିଇଡ଼ି କଲେଜ ନିକଟରୁ ଯୁବତୀଙ୍କ ସାଇକେଲ୍ରୁ ଭ୍ୟାନିଟି ବ୍ୟାଗ୍ ଛଡ଼ାଇ ନେବା ଘଟଣାରେ ସଂପୃକ୍ତ ଲୁଟେରାକୁ ପୁଲିସ ଗିରଫ କରିଛି । ଗିରଫ ଅଭିଯୁକ୍ତ ନାଲ୍କୋନଗର ଥାନା କନିଆଁବେଡ଼ା ଗ୍ରାମର ଚିନୁ ଓରଫ୍ ଚିନ୍ମୟ । ମଙ୍ଗଳବାର ଅପରାହ୍ନରେ ଅନୁଗୁଳ ବଜାରରେ ବୁଲୁଥିବା ବେଳେ ଥାନା ଏସ୍ଆଇ ପ୍ରକାଶ ମାଝିଙ୍କ ନେତୃତ୍ୱରେ ପୁଲିସ ଟିମ୍ ଚିନୁକୁ କାବୁ କରି ନେଇଥିଲା । ସେ ଏକ ବୁଲେଟ ମଟର ସାଇକେଲ୍ରେ ବୁଲୁଥିବା ବେଳେ ପୁଲିସ ନଜରରେ ପଡ଼ିଥିଲା । ଚିନୁକୁ ମଙ୍ଗଳବାର କୋର୍ଟ ଚାଲାଣ କରାଯାଇଥିବା ପୁଲିସ ପ୍ରକାଶ କରିଛି ।
