ଅନୁଗୁଳ ( ଆୱାଜ ମିଡ଼ିଆ ) – ଟଙ୍କଧର ଗଡ଼ନାୟକ : ଜରପଡା ଥାନା ଅନ୍ତର୍ଗତ ତପୋବନ ଢାବା ପଛ ଦଲକି ପାହାଡ଼ରୁ ଜଣେ ମହିଳାଙ୍କ ଗଳିତ ମୃତ ଦେହ ମିଳିଛି । ମହିଳାଙ୍କ ବେକକୁ ଏକ ସରୁ ଜିଆଇ ତାରରେ ବନ୍ଧା ଯାଇ ଆମ୍ବଗଛ ଡାଳରେ ଝୁଲାଇ ଦିଆଯାଇଛି । ତେବେ ମହିଳା ନିଜେ ଆତ୍ମହତ୍ୟା କରିଛନ୍ତି କି କେହି ତାଙ୍କୁ ହତ୍ୟା କରି ଏଠାରେ ଟାଙ୍ଗି ଦେଇଛି ସେ ନେଇ ଏବେ ଯାଏଁ ଜଣା ପଡିନାହିଁ । ମୃତ ମହିଳାଙ୍କ ବୟସ ୪୫ ବର୍ଷ ହେବ ବୋଲି ଅନୁମାନ କରାଯାଉଛି । ଅନ୍ୟପଟେ ଏନେଇ ଜରପଡା ପୁଲିସ କୁ ଖବର ଦିଆଯିବା ପରେ ସେମାନେ ବହୁ ବିଳମ୍ବରେ ଘଟଣାସ୍ଥଳରେ ପହଞ୍ଚିଥିଲେ । ମିଳିଥିବା ସୂଚନା ଅନୁସାରେ, ଶନିବାର ସକାଳେ ଛେଳି ଚରାଇବାକୁ ଯାଇଥିବା ଜଣେ ବ୍ୟକ୍ତି ମହିଳାଙ୍କ ଝୁଲନ୍ତା ମୃତଦେହ ଦେଖିଥିଲେ । ଏ ନେଇ ସେ ପ୍ରଥମେ ସ୍ଥାନୀୟ ଲୋକଙ୍କୁ କହିବା ସହ ଜରପଡା ପୁଲିସକୁ ସୂଚନା ଦେଇଥିଲେ । ଏ ନେଇ ଜରପଡା ଆଇଆଇସି ସରୋଜକାନ୍ତ ସାମଲଙ୍କୁ ପଚାରିବାରୁ ସେ ଖବର ପାଇଛନ୍ତି ଓ ଆସି ପହଞ୍ଚିବେ ବୋଲି କହିଛନ୍ତି । ତେବେ ପୁଲିସ ତଦନ୍ତ ପରେ ହିଁ ଏହା ହତ୍ୟା କି ଆତ୍ମହତ୍ୟା ଜଣାପଡିବ ।
