ଯାଜପୁର ( ଆୱାଜ ମିଡ଼ିଆ ) – ଜିଜ୍ଞାସୁ ସାହୁ : ସୁକିନ୍ଦା ଥାନା ଅନ୍ତର୍ଗତ ଓଳିଆ ପଞ୍ଚାୟତ ପାଖ ଭାଲୁକାନ୍ତିଆ ରାସ୍ତାରେ ଗୁରୁବାର ଜଣେ ଅଜଣା ବ୍ୟକ୍ତି ବାଇକ୍ ଦୁର୍ଘଟଣା ଗ୍ରସ୍ତ ହୋଇ ରାସ୍ତାରେ ବେହୋସ୍ ହୋଇ ପଡ଼ି ରହିଥିଲେ . ସ୍ଥାନୀୟ ଲୋକେ ସରକାରୀ 108 ଆମ୍ବୁଲାନ୍ସ ସହିତ ଯୋଗାଯୋଗ କରି ଆହତ ବ୍ୟକ୍ତିଙ୍କୁ ଉଦ୍ଧାର କରି ସୁକିନ୍ଦା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରେଇ ଚିକିତ୍ସା କରାଇଥିବା ଦେଖିବାକୁ ମିଳିଥିଲା . ଆହତ ବ୍ୟକ୍ତିଙ୍କର ମୁଣ୍ଡରେ ଗଭୀର ଆଘାତ ଲାଗି ଚେତା ଶୂନ୍ୟ ହୋଇଥିବା ବେଳେ ଦୀର୍ଘ ସମୟ ପର୍ଯ୍ୟନ୍ତ ଚେତା ନଆସିବା କାରଣରୁ ତାଙ୍କର କିଛି ପରିଚୟ ମିଳିପାରି ନଥିଲା . ସୁକିନ୍ଦା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର କର୍ମଚାରୀ ସୁକିନ୍ଦା ଥାନାକୁ ସୂଚନା ଦେଇ ଆହତଙ୍କୁ ଆମ୍ବୁଲାନ୍ସ ଯୋଗେ ଗୁରୁବାର ଦିନ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନନ୍ତରିତ କରିଥିଲେ . ଆଜି ସକାଳୁ ଆହତ ବ୍ୟକ୍ତିଙ୍କ ପରିବାର ଲୋକେ ପବ୍ଲିକ ଆପ ମାଧ୍ୟମରେ ଖବର ପାଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଯାଇ ପହଂଚିବା ବେଳକୁ ଆହତ ବ୍ୟକ୍ତିଙ୍କର ମୃତ୍ୟୁ ହୋଇ ଯାଇଥିଲା . ପରିବାର ବର୍ଗଙ୍କ ସୂଚନା ମୁତାବକ ମୃତକ ବ୍ୟକ୍ତିଙ୍କ ଘର ଛଡେଇଧରା ପାଖ ବାଲିସାହି ବାସିନ୍ଦା ଏବଂ ସମରେନ୍ଦ୍ର ସ୍ୱାଇଁ ବୋଲି ଜଣାଯାଇଛି .
