ଗଜପତି ( ଆୱାଜ ମିଡ଼ିଆ ) – ବିବେକାନନ୍ଦ ବେହେରା : କାଶୀନଗର ବ୍ଲକ ଅନ୍ତର୍ଗତ କିଡିଗାଁ ଗ୍ରାମରେ ଗତକାଲି ମଧ୍ୟରାତ୍ରୀ ପ୍ରାୟ ୧ ଘଟିକା ସମୟରେ ଅଜଣା ବନ୍ୟଜନ୍ତୁ ଆକ୍ରମଣରେ ୬୩ ଛେଳି ମେଣ୍ଢା ମୃତ୍ୟୁ ହୋଇଥିବା ବେଳେ ୨୩ ଗୁରୁତର ଭାବେ ଆହତ ହୋଇଛନ୍ତି । ମୃତ ଗୃହପାଳିତ ପଶୁ ଗୁଡିକ ଗ୍ରାମର ଚାଷୀ ବିରା କ୍ରିଷ୍ଣା ଓ ବିରା ରାମୁଙ୍କର ବୋଲି ଜଣାପଡିଛି । ବହୁ ବର୍ଷ ଧରି ଏମାନେ ଛେଳିମେଣ୍ଢା ଚାଷ କରି ପେଟ ପୋଷଣ କରୁଥିବା ବେଳେ ଏପରି ଘଟଣାକୁ ନେଇ ଭାଗ୍ୟକୁ ଦୋଷ ଦେଇ ଅସହାୟ ହୋଇ ଯାଇଛନ୍ତି । ଖବର ଜାଣି ଜିଲ୍ଲା ପରିଷଦ ଅଧ୍ୟକ୍ଷ ଗାବରା ତିରୁପତି ରାଓ ଘଟଣା ସ୍ଥଳରେ ପହଞ୍ଚି ପ୍ରାଣୀ ଚିକିତ୍ସା ଅଧିକାରୀଙ୍କୁ ସୂଚନା ଦେଇଥିଲେ । ପ୍ରାଣୀ ଚିକିତ୍ସା ଅଧିକାରୀ ବଣିକାନ୍ତ ଖଟୁଆ ପହଞ୍ଚି ଆହତ ଛେଳି ମେଣ୍ଡା ଗୁଡିକକୁ ଚିକିତ୍ସା କରିଥିଲେ। ଚାଷୀମାନେ ମୃତ ଛେଳିମେଣ୍ଢା ପାଇଁ ଆର୍ଥିକ ସହାୟତା ଯୋଗାଇବା ନିମନ୍ତେ ସରକାରଙ୍କୁ ଅନୁରୋଧ କରିଛନ୍ତି । ଏ ନେଇ ଗ୍ରାମବାସୀ ଭୟଭୀତ ହେବା ସହ ବନ୍ୟଜନ୍ତୁ ଠାରୁ ସୁରକ୍ଷା ନିମନ୍ତେ ଜିଲ୍ଲା ପ୍ରଶାସନକୁ ତୁରନ୍ତ ପଦକ୍ଷେପ ନେବା ପାଇଁ ଦାବି କରିଛନ୍ତି ।
