ଯାଜପୁର ( ଆୱାଜ ମିଡ଼ିଆ ) – ଜିଜ୍ଞାସୁ ସାହୁ : ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ସୁକିନ୍ଦାଗଡର ବହୁ ପୁରାତନ ମେଲଣ ପର୍ବ ମହା ଆଡ଼ମ୍ବରରେ ଅନୁଷ୍ଠିତ ହୋଇଛି । ଏହି ମେଲଣ ପର୍ବରେ ଥାନପତିଙ୍କ ଗ୍ରାମ ପରିକ୍ରମା ପରେ ସୁକିନ୍ଦା ଗଡର ବିଭିନ୍ନ ସାହିରୁ ସୁସଜ୍ଜିତ ବିମାନ ରଥ ଛକ ସ୍ଥିତ ମେଲଣ ପଡ଼ିଆରେ ଏକତ୍ରିତ ହୋଇଥିଲେ । ସନ୍ଧ୍ୟା ସମୟରୁ ଆରମ୍ଭ ହୋଇଥିବା ଏହି ମେଲଣ ପର୍ବ ରାତି ତମାମ୍ ଜାରି ରହିଥିଲା । ଜନସମାଗମ ପାଇଁ ନାମୀଦାମୀ କଣ୍ଠଶିଳ୍ପୀଙ୍କ ଦ୍ଵାରା ଭଜନ ସମାରୋହ ଅନୁଷ୍ଠିତ ହୋଇଥିଲା । ରବିବାର ସକାଳୁ ମେଲଣ ପଡିଆକୁ ଆସୁଥିବା ବିମାନ ମଧ୍ୟରୁ ସୁସଜ୍ଜିତ ବିମାନକୁ ପୁରସ୍କୃତ କରାଯାଇଥିଲା । ଏହି ବିଶେଷ କାର୍ଯ୍ୟକ୍ରମରେ ଯୋଗ ଦେଇଥିବା ବିମାନ ଗୁଡ଼ିକୁ ସୁନ୍ଦର ଭାବେ ସଜାଇବା ସହ ଗୌଡ଼ବାଡ଼ି ଖେଳ, ନାଚ ଗୀତ ସହିତ ବିଭିନ୍ନ ପାରମ୍ପରିକ କାର୍ଯ୍ୟକ୍ରମ ସହ ମେଲଣ ପଡିଆରେ ପହଞ୍ଚିଥିଲେ । କିଛିବି ଅପ୍ରୀତିକର ପରିସ୍ଥିତିକୁ ଦୃଷ୍ଟିରେ ରଖି ସ୍ଥାନୀୟ ପୋଲିସ୍ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଥିବା ଦେଖିବାକୁ ମିଳିଥିଲା ।
