ଯାଜପୁର ( ଆୱାଜ ମିଡ଼ିଆ ) – ଜିଜ୍ଞାସୁ ସାହୁ : ସୁକିନ୍ଦା ଥାନା ଅଂଚଳରେ ଦୁଇଟି ପୃଥକ ଦୁର୍ଘଟଣାରେ ଜଣଙ୍କର ମୃତ୍ୟୁ ଘଟିଥିବା ବେଳେ ଦୁଇ ଜଣ ଗୁରୁତର ଆହତ ହୋଇଥିବା ଜଣାପଡିଛି । ୫୩ନଂ ଜାତୀୟ ରାଜପଥ ସୁକିନ୍ଦା ଭୁବନ ରାସ୍ତାର ଟସର ଫାର୍ମ ନିକଟରେ ଏକ ଦୁର୍ଘଟଣା ଘଟି ଅଭୟପୂର୍ ଗ୍ରାମ ଜିତେନ୍ଦ୍ର ଙ୍କର ମୃତ୍ୟୁ ଘଟିଥିବା ବେଳେ ମଙ୍ଗଳପୁର ଗ୍ରାମ ଭୋଳା ଲେଙ୍କା ଗୁରୁତର ଆହତ ହୋଇ କଟକ ସ୍ଥାନାନ୍ତର ହୋଇଛନ୍ତି । ସୂଚନା ଅନୁଯାୟୀ ନିର ଲେଙ୍କାଙ୍କ ପୁଅ ଭୋଳା ଓ ବିଜୟ ନାୟକଙ୍କ ପୁଅ ଜିତେନ୍ଦ୍ର ଏକ ଲୁନା ଗାଡିରେ ଅଭୟପୂର ଯାଉଥିବା ସମୟରେ ଟସର ଫାର୍ମ ନିକଟରେ ଦୁର୍ଘଟଣାର ଶୀକାର ହୋଇଥିଲେ । ଖବର ପାଇ ସୁକିନ୍ଦା ଦମକଳ ବାହିନୀ ଘଟଣାସ୍ଥଳରୁ ଉଭୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସୁକିନ୍ଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଚିକିତ୍ସା ଚାଲିଥିବା ସମୟରେ ଜିତେନ୍ଦ୍ରର ମୃତ୍ୟୁ ଘଟିଥିଲା, ଭୋଳା ଙ୍କର ଅବସ୍ଥା ଗୁରୁତର ଥିବାରୁ କଟକ ସ୍ଥାନାନ୍ତର କରାଯାଇଛି । ଖବର ପାଇ ପୋଲିସ ଶବ ଜବତ କରିବା ସହ ମାମଲା ରୁଜୁ କରି ଶବ ବ୍ୟବଛେଦ ପାଇଁ ପଠାଇଛି । ସେହିପରି ସୁକିନ୍ଦା ହାତିବାରୀ ରାସ୍ତାର ଆମ୍ବସାର ଛକ ନିକଟରେ ଏକ ଦୁର୍ଘଟଣା ଘଟି ହାତିବାରି ଗ୍ରାମ ରମାକାନ୍ତ ବେହୁରା ଗୁରୁତର ଆହତ ହୋଇ ସୁକିନ୍ଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଛନ୍ତି ।
