ଯାଜପୁର ( ଆୱାଜ ମିଡ଼ିଆ ) – ଜିଜ୍ଞାସୁ ସାହୁ : ଖଣି ଅଞ୍ଚଳରୁ ନାବାଳିକା ଓ ମହିଳାଙ୍କୁ ଅନ୍ୟ ରାଜ୍ୟକୁ ଚାଲାଣ ଅଭିଯୋଗରେ ଦୁଇ ଜଣ ଗିରଫ ! କାଳିଆପାଣି ଥାନା ଅନ୍ତର୍ଗତ ସୁକିନ୍ଦା ଖଣି ଅଞ୍ଚଳରୁ ନାବାଳିକା ଓ ମହିଳାଙ୍କୁ ଅନ୍ୟ ରାଜ୍ୟକୁ ଚାଲାଣ କରାଯାଉଥିବା ଘଟଣାରେ କାଳିଆପାଣି ପୋଲିସ ଜଣେ ଯୁବକ ଓ ଯୁବତୀଙ୍କୁ ଗିରଫ କରି କୋର୍ଟ ଚାଲାଣ କରିଛି । ସୂଚନା ମୁତାବକ କଙ୍କଡାହାଡ ଥାନା ଅନ୍ତର୍ଗତ ରୁପାବେଡ଼ା ଗ୍ରାମର ମୁରଲୀଧର ଦାସଙ୍କ ସ୍ତ୍ରୀ ରିନା ଦାସ ଓ କାଳିଆପାଣି ବାସିନ୍ଦା ପ୍ରଫୁଲ୍ଲ କୁମାର ବେହେରାଙ୍କ ଘର ଜୋଇଁ ଶୁକଦେବ ଦେହୁରି ସୁକିନ୍ଦା ଖଣି ଅଞ୍ଚଳରୁ ନାବାଳିକା ଓ ମହିଳାଙ୍କୁ ଟଙ୍କା ଲୋଭ ଦେଖାଇ ଅନ୍ୟ ରାଜ୍ୟକୁ ଚାଲାଣ କରୁଥିଲେ । ଏନେଇ ସ୍ଥାନୀୟ ଜନ ପ୍ରତିନିଧି ଖବର ପାଇ କାଳିଆପାଣି ପୋଲିସକୁ ସୂଚନା ଦେଇଥିଲେ । କାଳିଆପାଣି ପୋଲିସ ସୂଚନା ପାଇ ତୁରନ୍ତ ଘଟଣାସ୍ଥଳରେ ପହଞ୍ଚି ଚାଲାଣ ହେଉଥିବା ନାବାଳିକା ଓ ମହିଳାଙ୍କୁ ଉଦ୍ଧାର କରିବା ସହିତ ଚାଲାଣକାରୀ ରିନା ଦାସ ଓ ଶୁକଦେବ ଦେହୁରିଙ୍କୁ ଗିରଫ କରିଥିଲା । କାଳିଆପାଣି ପୋଲିସ ଉଦ୍ଧାର କରିଥିବା ନାବାଳିକାଙ୍କୁ ସୁକିନ୍ଦା ଶିଶୁ ଯତ୍ନ ଗୃହ ଓ ମହିଳାଙ୍କୁ ସରକାରୀ ସୁକିନ୍ଦା ଆମ ଘରକୁ ପଠାଇଛି । କାଳିଆପାଣି ପୋଲିସ ଅଭିଯୋଗକୁ ଭିତ୍ତି କରି ସାକ୍ଷ୍ୟ ପ୍ରମାଣ ଆଧାରରେ ମାମଲା ରୁଜ୍ଜୁ କରି ଅଭିଯୁକ୍ତ ରିନା ଦାସ ଓ ଶୁକଦେବ ଦେହୁରିଙ୍କୁ କୋର୍ଟ ଚାଲାଣ କରିଥିବାର ଜଣାଯାଇଛି ।
