ବାଙ୍କୀ ( ଆୱାଜ ମିଡ଼ିଆ ) – ବ୍ୟୁରୋ ରିପୋର୍ଟ : ବିରୋଧୀଙ୍କ ବିଦ୍ରୋହୀ ଗୋଷ୍ଠୀ ଭରସାରେ ଜିତିବାର ସ୍ୱପ୍ନ ଦେଖୁଛନ୍ତି ସରପଞ୍ଚ ପ୍ରାର୍ଥୀ . ଏପରି ଏକ ଅଜବ ସମୀକରଣ ଦେଖିବାକୁ ମିଳିଛି ବାଙ୍କୀ ନିର୍ବାଚନ ମଣ୍ଡଳୀ ଡମପଡା ବ୍ଲକ ର ଦୁଲଣାପୁର ଗ୍ରାମପଞ୍ଚାୟତରେ . ସୂଚନା ଅନୁସାରେ ପଞ୍ଚାୟତରେ ଶାସକ ଦଳର ସବୁଠାରୁ ସକ୍ରିୟ ନେତା ଚଳିତ ନିର୍ବାଚନରେ ଟିକେଟ ନ ପାଇବା ପରେ ଆରମ୍ଭ ହୋଇଛି ଏହି ନୂତନ ସମୀକରଣ . ଶତ୍ରୁର ଶତ୍ରୁ ମିତ୍ର ନ୍ୟାୟରେ ବିଜେପି ସମର୍ଥିତ ପ୍ରାର୍ଥୀ ଏବଂ ବିଜେଡିର ଅସନ୍ତୁଷ୍ଟ ନେତା ଏବେ ଏକାଠି ମିଶି ଗୋଟି ଚଳାଉଛନ୍ତି . ତିନି ପ୍ରମୂଖ ରାଜନୈତିକ ଦଳ ଉଭୟ ସରପଞ୍ଚ ଏବଂ ସମିତି ସଭ୍ୟ ପଦବୀ ପାଇଁ ନିଜ ଦଳର ନେତାଙ୍କୁ ସମର୍ଥନ କରୁଥିବା ସମୟରେ ଏହି ପଞ୍ଚାୟତରୁ ସମିତି ସଭ୍ୟ ଲଢ଼ୁଛନ୍ତି ବାଙ୍କୀ ବିଜେଡିର ଆଗ ଧାଡ଼ିର ନେତା ପ୍ରଣବ କିଶୋର ପଟେଲ . ତେବେ ସମିତି ସଭ୍ୟ ପଦ ପାଇଁ ବେଶୀ କିଛି ଟଣା ଓଟରା ନଥିଲେ ସୁଦ୍ଧା ସରପଞ୍ଚ ପଦବୀ ପାଇଁ ଲାଗିଛି ଛକାପଞ୍ଝା . ଶାସକ ଦଳ ସମର୍ଥିତ ପ୍ରାର୍ଥୀ ସ୍ଥାନୀୟ ଜିଲ୍ଲା ପରିଷଦ ଏବଂ ସମିତି ସଭ୍ୟଙ୍କ ସହିତ ମିଶି ଜଏଣ୍ଟ କ୍ୟାମ୍ପେନ କରୁଥିବାର ଦେଖାଯାଇଛି . କିନ୍ତୁ ପଞ୍ଚାୟତର ପୂର୍ବତନ ସରପଞ୍ଚ କାହା ସପକ୍ଷରେ ତାହା ଲୋକେ ବୁଝି ପାରୁ ନାହାନ୍ତି . ଶାସକ ଦଳର ସମର୍ଥିତ ପ୍ରାର୍ଥୀ କହୁଛନ୍ତି . ବଡ ବାବୁ ହୁଇପ ଜାରି କରିଛନ୍ତି କେହି କୁଆଡେ ହଲି ପାରିବେନି . ତେବେ ବିଜେପି ସମର୍ଥିତ ପ୍ରାର୍ଥୀ ତୁଳସୀପୁର ରୁ ଚାଲୁଥିବା ରିମୋର୍ଟ କଣ୍ଟ୍ରୋଲ ଉପରେ ପୁରା ଭରସା କରି ବସିଛନ୍ତି . ଅନ୍ୟ ପକ୍ଷରେ ପଞ୍ଚାୟତର ଦୁଲଣାପୁର ଗ୍ରାମରେ ନିଜର ଗଡ ଜଗି ବସିଥିବା କଂଗ୍ରେସ ନେତା , ଅରପୁର ଏବଂ ବାରବାଟୀ ଭୋଟ କିଛି ହାତେଇ ପାରିଲେ ନିଜ ପ୍ରାର୍ଥୀ ବାଜି ମାରିନେବେ ବୋଲି ହିସାବ ଲଗାଇ ସାରିଲେଣି . ତେବେ ରାଜନୀତି ଗଣିତ କହୁଛି , ପୂର୍ବତନ ସରପଞ୍ଚ ଯୋଉ ଆଡକୁ ଢ଼ଲିବେ – ସେ ପଲ୍ଲା ଭାରି ରହିବ .
