ଆୱାଜ ମିଡ଼ିଆ ( ବ୍ୟୁରୋ ରିପୋର୍ଟ ) : ଟି-୨୦ ବିଶ୍ୱକପର ପ୍ରଥମ ସେମି ଫାଇନାଲ ଲଢ଼େଇ । ଗୋଟିଏ ପଟେ ପାକିସ୍ତାନ ଥିବା ବେଳେ ଅନ୍ୟପଟେ ରହିଛି ନ୍ୟୁଜିଲ୍ୟାଣ୍ଡ । ଭାରତୀୟ ସମୟ ଦିନ ୧.୩୦ରେ ଏହି ମ୍ୟାଚ୍ ଆରମ୍ଭ ହେବ। ଏଥିପାଇଁ ପାଇଁ ସିଡ୍ନୀ କ୍ରିକେଟ ଗ୍ରାଉଣ୍ଡ ପ୍ରସ୍ତୁତ ହୋଇ ରହିଛି । ନ୍ୟୁଜିଲ୍ୟାଣ୍ଡ ସୁପର ୧୨ ର ନମ୍ବର ୱାନ ଦଳ ଭାବେ ସେମିକୁ ପ୍ରବେଶ କରିଥିବା ବେଳେ ପାକିସ୍ତାନ ଦ୍ୱିତୀୟ ଦଳ ଭାବେ ସେମି ଟିକେଟ ହାସଲ କରିଥିଲା । ନ୍ୟୁଜିଲ୍ୟାଣ୍ଡ ଅପେକ୍ଷା ପାକିସ୍ତାନର ସେମି ଫାଇନାଲ ରାସ୍ତା ଅତ୍ୟନ୍ତ କଠିନ ଥିଲା। ଗୃପ ପର୍ଯ୍ୟାୟର ଶେଷ ଦିନ ଯାଏ ବାବର ଆଜମଙ୍କ ଟିମ ସେମିକୁ ଯିବ କି ନାହିଁ ତା’କୁ ନେଇ ସସପେନ୍ସ ଲାଗି ରହିଥିଲା । ନେଦରଲ୍ୟାଣ୍ଡ୍ସ ଶେଷ ମ୍ୟାଚ୍ରେ ଦକ୍ଷିଣ ଆଫ୍ରିକାକୁ ଅପ୍ରତ୍ୟାଶିତ ଭାବେ ପରାସ୍ତ କରିବାରୁ ପାକିସ୍ତାନ ପାଇଁ ସେମି ଫାଇନାଲ ଯିବାକୁ ବାଟ ଫିଟିଥିଲା । ଏହି ସୁଯୋଗକୁ ବାବର ଆଣ୍ଡ କୋ ହାତ ଛଡ଼ା କରି ନଥିଲେ । ଶେଷ ମ୍ୟାଚ୍ରେ ବାଂଲାଦେଶକୁ ବେଶ ସହଜରେ ହରାଇ ପାକିସ୍ତାନ ସେମି ଫାଇନାଲ ଟିକେଟ ହାତେଇଛି । ୨୦୦୭ ଟି-୨୦ ବିଶ୍ୱକପ ସେମିରେ ମଧ୍ୟ ନ୍ୟୁଜିଲ୍ୟାଣ୍ଡକୁ ହରାଇ ପାକିସ୍ତାନ ଫାଇନାଲ କୁ ଯାଇଥିଲା । ତେଣୁ ୨୦୨୨ ଟି-୨୦ ବିଶ୍ୱକପରେ ଦଳ ସମାନ ଇତିହାସର ପୁନରାବୃତ୍ତି ଲକ୍ଷ୍ୟରେ ରହିଛି। ଦଳ ସୁପର ୧୨ରେ ପାଇଥିବା ଝଟକାକୁ ଭୁଲି ଏବେ ଆଗକୁ ବଢ଼ିଛି। ଉଭୟ ବୋଲିଂ ଓ ବ୍ୟାଟିଂରେ ଦଳର ଖେଳାଳିମାନେ ଲୟକୁ ଫେରିଛନ୍ତି। କେବଳ ମହମ୍ମଦ ରିଜୱାନ ଓ ବାବର ଆଜମ ଏଯାଏ ଆଖିଦୃଶିଆ ପ୍ରଦର୍ଶନ କରିପାରି ନାହାନ୍ତି।
