ନୟାଗଡ ( ଆୱାଜ ମିଡ଼ିଆ ) – ବିଶ୍ବଭୂଷଣ ମହାପାତ୍ର : ନୟାଗଡ ସଦର ଥାନା ଅନ୍ତର୍ଗତ ମାଳିସାହି ଫାଣ୍ତି ନିକଟରେ ବାଣ ବିସ୍ଫୋରଣ ହୋଇଥିବା ଦେଖିବାକୁ ମିଳିଛି । ବାଣ ବିସ୍ଫୋରଣ ପରେ ଏକ ପାଳଗଦାରେ ନିଆଁ ଲାଗି ଯାଇଥିବା ବେଳେ ସ୍ଥାନୀୟ ଲୋକଙ୍କ ଉଦ୍ୟମରେ ପ୍ରଥମେ ନିଆଁକୁ ଆୟତ କରାଯାଇଥିଲା ! ପରେ ଅଗ୍ନିଶମ ବାହିନୀ ଘଟଣାସ୍ଥଳରେ ପହଂଚି ନିଆଁ ଲିଭାଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ, ନୂଆଗାଁ ବ୍ଲକ ମାଳିସାହି ଫାଣ୍ତି ସମେତ ପଂଚାୟତ କାର୍ଯ୍ୟାଳୟ, ପ୍ରାଣୀ ଚିକିତ୍ସାଳୟ ଏବଂ ବିଦ୍ୟାଳୟ ଭଳି ଗୁରୁତ୍ବପୂର୍ଣ୍ଣ କାର୍ଯ୍ୟାଳୟ ପାଖାପାଖି ଗୋଟିଏ ସ୍ଥାନରେ ଅବସ୍ଥିତ । ସନ୍ଧ୍ୟା ସମୟରେ ଜଣେ ବ୍ୟକ୍ତି ଫାଣ୍ତି ନିକଟରେ କିଛି ବାଣ ରଖିଦେଇ କେଉଁଆଡେ ଚାଲି ଯାଇଥିଲେ । ଏହାପରେ କୌଣସି କାରଣ ବସତଃ ହଠାତ୍ ବାଣରେ ନିଆଁ ଲାଗି ବିସ୍ଫୋରଣ ହୋଇଥିଲା । ପ୍ରାୟ କିଛି ସମୟ ଧରି ବାଣ ବିସ୍ଫୋରଣ ହେବା ଦେଖି ସ୍ଥାନୀୟ ଲୋକମାନେ ଭୟଭୀତ ହୋଇ ଘଟଣାସ୍ଥଳରେ ରୁଣ୍ତ ହୋଇ ଯାଇଥିଲେ । ବାଣ ବିସ୍ଫୋରଣ ହେବା ଫଳରେ ପାଖରେ ଥିବା ଏକ ପାଳଗଦାରେ ନିଆଁ ଲାଗି ଯାଇଥିଲା । ହେଲେ ଭୟରେ ନିଆଁ ଲାଗିଥିବା ସ୍ଥାନକୁ କେହି ଯାଇନଥିଲେ । ବାଣ ବିସ୍ଫୋରଣ ବନ୍ଦ ହେବାର କିଛି ସମୟ ପରେ ସ୍ଥାନୀୟ ଲୋକଙ୍କ ଉଦ୍ୟମରେ ନିଆଁକୁ ଆୟତ କରିଥିବା ବେଳେ ବାକି ନିଆଁକୁ ଅଗ୍ନିଶମ ବାହିନୀ ଆସି ଲିଭାଇଥିଲା ।
