ବାଣପୁର ( ଆୱାଜ ମିଡ଼ିଆ ) – ରାକେଶ ସାହୁ : ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଦେଖିବାକୁ ମିଳିଛି ଏକ ଅଭାବନୀୟ ଘଟଣା । ଜଣେ ବୃଦ୍ଧଙ୍କ ମୃତ ଦେହ ଶାଳିଆ କେନାଲ ରେ ଭାସୁଥିବା ସମୟରେ ମୃତଦେହକୁ ଉଦ୍ଧାର କରିଛି ବାଣପୁର ପୋଲିସ । ମୃତ ବୃଦ୍ଧ ଜଣଙ୍କ ହେଲେ ବାଣପୁର ମଙ୍ଗରାଜପୁର ଗ୍ରାମର ହିନ ଦେଇଙ୍କ ସ୍ବାମୀ ଶରତ ପାଣି (୫୯) ବର୍ଷ । ସୂଚନା ମୁତାବକ ଆଜି ଅପରାହ୍ନ ସମୟରେ ବାଣପୁର ମୁକ୍ତାଦେଇପୁର ଶାଳିଆ କେନାଲ ରେ ଶରତଙ୍କ ମୃତଦେହ ଭାସୁଥିବା ର ସ୍ଥାନୀୟ ଲୋକେ ଦେଖିବାକୁ ପାଇଥିଲେ । ସଙ୍ଗେ ସଙ୍ଗେ ସ୍ଥାନୀୟ ଲୋକେ ବାଣପୁର ପୋଲିସ କୁ ଖବର ଦେବା ସହ ବାଣପୁର ଅଗ୍ନିଶମ ବାହିନୀ କୁ ଖବର ଦେଇଥିଲେ । ବାଣପୁର ପୋଲିସ ଘଟଣା ସ୍ଥଳରେ ପହଞ୍ଚି ଶବ ଉଦ୍ଧାର କରିବା ସହିତ ମୃତ ବୃଦ୍ଧଙ୍କ ପରିବାର କୁ ଖବର ଦେଇଥିଲେ । ପୋଲିସ ଶବ କୁ ଜବତ କରି ୧୦ / ୨୩ ରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜାରି ରଖି ଶବ ବ୍ୟବଚ୍ଛେଦ ପାଇଁ ବାଣପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠେଇ ଦେଇଛି । ମୃତ ବୃଦ୍ଧ ଜଣଙ୍କ କିପରି କେନାଲ ପାଣି ମଧ୍ୟରେ ପଡ଼ିଲେ ଓ କାହିଁକି ତାଙ୍କର ମୃତ୍ୟୁ ଘଟିଲା ତାହା କାରଣ ଏବେ ଅସ୍ପଷ୍ଟ ଅଛି ।।
