ନୟାଗଡ ( ଆୱାଜ ମିଡ଼ିଆ ) – ବିଶ୍ବଭୂଷଣ ମହାପାତ୍ର : ନୟାଗଡ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ମାଳିସାହି ଗତିକେଶ୍ଵର ନୋଡାଲ ଉଚ୍ଚ ବିଦ୍ୟାଳୟରେ ଗତକାଲି ଜଣେ ଛାତ୍ର ପାଠପଢା ଚାଲିଥିବା ସମୟରେ ବିପଦସଂକୁଳ ଭାବେ ଗଛରେ ଚଢି ଡାଳ ହାଣୁଥିବାର ଦୃଶ୍ୟ ଦେଖିବାକୁ ମିଳିଥିଲା । ଯାହାକୁ ନେଇ ଅଭିଭାବକଙ୍କ ମହଲରେ ଅସନ୍ତୋଷ ସୃଷ୍ଟି ହୋଇଛି । ହେଲେ ସବୁଠାରୁ ବଡ ଆଶ୍ଚର୍ଯ୍ୟର ବିଷୟ ଛାତ୍ର ଜଣକ ଗଛରେ ଚଢି ଡାଳ ହାଣିବା କଥା ପ୍ରଧାନଶିକ୍ଷକଙ୍କ ଜାଣତରେ ହୋଇଥିବା ଜଣାପଡିଛି । ବିଦ୍ୟାଳୟର ଛାତ୍ରଛାତ୍ରୀଙ୍କୁ ଶିକ୍ଷାଦାନ ସହିତ ବିଭିନ୍ନ ସଚେତନତା ମୂଳକ କାର୍ଯ୍ୟକ୍ରମ ବିଷୟରେ ଅବଗତ କରାଯାଉଛି । ବିଦ୍ୟାଳୟ ସମେତ ବିଭିନ୍ନ ସ୍ଥାନରେ ଗଛ ଲଗାଇବା ପାଇଁ ଛାତ୍ରଛାତ୍ରୀଙ୍କୁ ଶିକ୍ଷା ଦିଆଯାଉଥିବା ବେଳେ ଗତିକେଶ୍ୱର ହାଇସ୍କୁଲରେ କିନ୍ତୁ କିଛି ଅଲଗା ଦୃଶ୍ୟ ଦେଖିବାକୁ ମିଳିଥିଲା । ବିଦ୍ୟାଳୟ ପରିସରରେ ଥିବା ଏକ ବିଶାଳକାୟ ଗଛର ଡାଳ ହାଣିବା ପାଇଁ ଜଣେ ଛାତ୍ରକୁ କୁହାଯାଇଥିଲା । ସେ ସାରଙ୍କ କଥାକୁ ଏଡାଇ ନପାରି ବିପଦସଂକୁଳ ଭାବେ ଗଛରେ ଚଢି ଡାଳ ହାଣିଥିବା ଦେଖିବାକୁ ମିଳିଥିଲା । ଗୋଟିଏ ପଟେ ଗଛ ଲଗାଇବା ପାଇଁ ଛାତ୍ରଛାତ୍ରୀଙ୍କୁ କୁହାଯାଉଥିବା ବେଳେ ଏଠାରେ କିନ୍ତୁ ବ୍ୟତିକ୍ରମ ଘଟି ଗଛ ଡାଳ କାଟିବା ପାଇଁ ଛାତ୍ରଛାତ୍ରୀଙ୍କୁ ଶିକ୍ଷା ଦିଆଯାଉଛି । ତେବେ ଏନେଇ ବିଦ୍ୟାଳୟର ପ୍ରଧାନଶିକ୍ଷକ କହିଛନ୍ତି କି ବିଦ୍ୟାଳୟର ଛାତ ଉପରେ ଗୋଟିଏ ଡାଳ ରହିଥିଲା ତ , ତାକୁ ହାଣିବା ପାଇଁ କହିଥିଲି । ଏଠାରେ କେହି ବ୍ୟବସ୍ଥାରେ ନାହାଁନ୍ତି ସମସ୍ତେ ଅବ୍ୟବସ୍ଥାରେ ଅଛନ୍ତି ବୋଲି ପ୍ରଧାନଶିକ୍ଷକ କହିଥିଲେ । ତେବେ ଏ ଦିଗରେ ବିଭଗୀୟ ଅଧିକାରୀ ଦୃଷ୍ଟି ଦେବା ସହ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି ।
