ବାଣପୁର ( ଆୱାଜ ମିଡ଼ିଆ ) – ରାକେଶ ସାହୁ : ଜଣେ ଯୁବକଙ୍କୁ ପିଟି ପିଟି ମାରି ଦିଆଯାଇଥିବା ନେଇ ବାଣପୁର ଥାନାରେ ହୋଇଛି ଅଭିଯୋଗ । ବାଣପୁର ପୁଲିସ ଭୁବନେଶ୍ଵର ଏମ୍ସ ହସ୍ପିଟାଲ ରୁ ମୃତ ଯୁବକଙ୍କ ଶବ ଜବତ କରିବା ସହ ବ୍ୟବଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛି । ଅଭିଯୁକ୍ତ ରଜତ କୁମାର ମିଶ୍ରଙ୍କୁ ଗିରଫ କରିଛି ପୁଲିସ । ଖବର ମୁତାବକ ଗତ ମଙ୍ଗଳବାର ରାତିରେ ବାଣପୁର ଥାନା କେନାଲ ସାହିର ରମେଶ ଚନ୍ଦ୍ର ଷଡଙ୍ଗୀଙ୍କ ପୁଅ ରଞ୍ଜନ ଷଡ଼ଙ୍ଗୀ ଙ୍କର ନିକଟସ୍ଥ ଗୋପାଳପୁର ଗ୍ରାମର ନନ୍ଦ କିଶୋର ମିଶ୍ର ଙ୍କ ସାନପୁଅ ରଜତ ମିଶ୍ର ଙ୍କ ସହ ଗଣ୍ଡଗୋଳ ହୋଇଥିଲା । ପାଣ୍ଡିରି ପଦର ଛକ ନିକଟରେ ଉଭୟଙ୍କ ମଧ୍ୟରେ ଯୁକ୍ତିତର୍କ ହେବା ସହ ରଜତ ମାଡ଼ ମାରିବାରୁ ରଞ୍ଜନ ଗୁରୁତର ହୋଇ ପଡ଼ିଥିଲେ । ସଙ୍ଗେ ସଙ୍ଗେ ଅଭିଯୁକ୍ତ ରଜତ , ନିଜେ ରଞ୍ଜନ କୁ ବାଣପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ନେଇଥିଲା । ହେଲେ ସେଠାରେ ତାଙ୍କ ଅବସ୍ଥା ସଙ୍କଟାପନ୍ନ ଥିବାରୁ ପରିବାର ଲୋକେ ଖବର ପାଇ ବାଣପୁର ମେଡିକାଲ ରେ ପହଞ୍ଚି ପ୍ରଥମେ କ୍ୟାପିଟାଲ ହସ୍ପିଟାଲ ଏବଂ ପରେ ଏମ୍ସକୁ ରଞ୍ଜନ ଙ୍କୁ ଚିକିତ୍ସା ପାଇଁ ନେଇଥିଲେ । ହେଲେ ଗୁରୁବାର ଦିନ ଏମ୍ସ ରେ ଚିକିତ୍ସାଧୀନ ଅବସ୍ଥାରେ ରଞ୍ଜନ ଙ୍କ ମୃତ୍ୟୁ ହୋଇଥିଲା । ମୃତ ରଞ୍ଜନଙ୍କ ମା ମଞ୍ଜୁଳା ଷଡ଼ଙ୍ଗୀଙ୍କ ଠାରୁ ସୂଚନା ପାଇ ବାଣପୁର ଥାନା ଅଧିକାରୀ ରମେଶ କୁମାର ଦେବତା ଏମ୍ସ ହସ୍ପିଟାଲ୍ ରେ ପହଞ୍ଚି ରଞ୍ଜନଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲେ । ଏନେଇ ବାଣପୁର ପୋଲିସ ୨୯୫/୨୩ ରେ ମୋକଦମା ରୁଜୁ କରିବା ସହ ଆଇପିସି ଦଫା ୩୦୨, ୧୦୯, ୨୯୪, ୫୦୬ ଓ ୩୪ ରେ ମାମଲା ରୁଜୁ କରି ଅଭିଯୁକ୍ତ ରଜତ ଙ୍କୁ ଗିରଫ କରି ତଦନ୍ତ ଜାରି ରଖିଥିବାର ସୁଚନା ମିଳିଛି । ଘଟଣାଟି ସ୍ଥାନୀୟ ଅଞ୍ଚଳରେ ଆଲୋଡନ ସୃଷ୍ଟି କରିଛି।
