ଯାଜପୁର ( ଆୱାଜ ମିଡ଼ିଆ ) – ଜିଜ୍ଞାସୁ ସାହୁ : ୫୩ ନଂ ଜାତୀୟ ରାଜପଥ ସୁକିନ୍ଦା ଭୁବନ ରାସ୍ତାର ପୋବଳ ଛକ ନିକଟରେ ମର୍ମନ୍ତୁଦ ସଡକ ଦୁର୍ଘଟଣା ! ୪ ଜଣ ଗୁରୁତର ଅବସ୍ଥାରେ ସୁକିନ୍ଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଛନ୍ତି । ପୋବଳ ଗ୍ରାମର ଅର୍ଜୁନ ସିଂକୁଙ୍କ ପୁଅ ଟୁନା ସିଂକୁ (୨୭), ଝିଅ ସମ୍ବାରୀ ସିଂକୁ (୩୦), ନାତି (୧) ଓ ବିଦ୍ୟାଧର ବାନରାଙ୍କ ପତ୍ନୀ ତିଉଁ ବାନରା ଭୁବନ ଯିବା ପାଇଁ ବସକୁ ଅପେକ୍ଷା କରି ପୋବଳ ଛକ ନିକଟରେ ଠିଆ ହୋଇଥିଲେ । ସେହି ସମୟରେ ଭୁବନ ଯାଉଥିବା ଏକ ଯାତ୍ରୀବାହୀ ଟାଟା ମ୍ୟାଜିକ ସେମାନଙ୍କୁ ଦେଖି ଅଟକିଥିଲା । ଠିକ୍ ସେହି ସମୟରେ ଏକ ଦ୍ରୁତଗାମୀ ହାଇୱା ମ୍ୟାଜିକକୁ ପଛପଟୁ ଧକ୍କା ଦେଇଥିଲା । ଏହି ଦୁର୍ଘଟଣାରେ ମ୍ୟାଜିକ ଓଲଟି ପଡ଼ି ଅପେକ୍ଷା କରିଥିବା ଯାତ୍ରୀଙ୍କୁ ଧକା ଦେଇଥିଲା । ମ୍ୟାଜିକ ଦୁର୍ଘଟଣାରେ ଟୁନା, ସଂବାରୀ, ତୀଉଁ ଓ ଡ୍ରାଇଭର ଉତ୍ତମ ଦାସ(୪୦) ଆହତ ହୋଇଥିବା ବେଳେ ତାଙ୍କ ସହ ଥିବା ଏକ ବର୍ଷର ନିଷ୍ପାପ ଶିଶୁପୁତ୍ର ସମ୍ପୂର୍ଣ୍ଣ ସୁସ୍ଥ ଥିବା ଜଣାପଡିଛି । ଖବର ପାଇ ସୁକିନ୍ଦା ଦମକଳ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ଆହତ ମାନଙ୍କୁ ଉଦ୍ଧାର କରି ସୁକିନ୍ଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ସମସ୍ତଙ୍କର ଚିକିତ୍ସା ଜାରି ରହିଛି । ଟିଉଁ ଅବସ୍ଥା ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ତୁରନ୍ତ କଟକ ସ୍ଥାନାନ୍ତର କରାଯାଇଛି ।
