ବାଙ୍କୀ // ଡମପଡା ( ଆୱାଜ ମିଡ଼ିଆ ) – ବ୍ୟୁରୋ ରିପୋର୍ଟ : ସାମାଜିକ ଅନୁଷ୍ଠାନ ଜନମଙ୍ଗଳ ପରିଷଦ ପକ୍ଷରୁ ଆଜି ଜଙ୍ଗଲ ମଧ୍ୟରେ ଥିବା ଏକ ଆଦିବାସୀ ଗାଁ ରେ ଶୀତବସ୍ତ୍ର ବଣ୍ଟନ କରାଯାଇଛି | ରାଜଧାନୀ ଉପକଣ୍ଠ ଚନ୍ଦକା-ଡମପଡା ଅଭୟାରଣ୍ୟର ଆଭ୍ୟନ୍ତରୀଣ ଘଞ୍ଚ ଜଙ୍ଗଲ ମଧ୍ୟରେ ଥିବା ଆଦିବାସୀ ଗାଁ ଢ଼ୋଲକାଠ ରେ ପରିଷଦର କର୍ମକର୍ତ୍ତା ମାନେ ପହଞ୍ଚି ଶୀତବସ୍ତ୍ର ପ୍ରଦାନ କରିଥିଲେ | କିଛି ଦିନ ହେବ ଅନୁଭୂତ ହେଉଥିବା ହାଡଭଙ୍ଗା ଶୀତରେ ଏହି ଅସହାୟ ନିରୀହ ଆଦିବାସୀ ଶ୍ରେଣୀୟ ଲୋକମାନଙ୍କ ପାଖରେ ନା ଥିଲା ଭଲ ଘର ଖଣ୍ଡେ ନା ଭଲ ଶୀତବସ୍ତ୍ରଟିଏ | ସ୍ଥାନୀୟ କିଛି ସେବା ମନୋଭାବ ବ୍ୟକ୍ତିଙ୍କ ଠାରୁ ଏବିଷୟରେ ସୂଚନା ପାଇଁ ଜନମଙ୍ଗଳ ପରିଷଦ ପକ୍ଷରୁ ତୁରନ୍ତ ପଦକ୍ଷେପ ନିଆଯାଇଥିଲା | ଗତ 8 ବର୍ଷ ଧରି ଶୀତ ଦିନରେ ଅସହାୟ ମାନଙ୍କୁ ଶୀତବସ୍ତ୍ର ପ୍ରଦାନ କରିଆସୁଥିବା ଜନମଙ୍ଗଳ ପରିଷଦ ଏବର୍ଷ ମଧ୍ୟ ଗତ ଡିସେମ୍ବର ମାସରୁ ଶୀତବସ୍ତ୍ର ବଣ୍ଟନ କାର୍ଯ୍ୟକ୍ରମ କରିଆସୁଅଛି | ସେହି କ୍ରମରେ ଆଜି ଚନ୍ଦକା ଜଙ୍ଗଲ ମଧ୍ୟରେ ଥିବା ଆଦିବାସୀ ଗାଁ ଢ଼ୋଲକାଠ ରେ ପ୍ରାୟ 80 ଗୋଟି ପରିବାରରେ ଆଦିବାସୀ ଶ୍ରେଣୀୟ ଲୋକମାନଙ୍କୁ କମ୍ବଳ ପ୍ରଦାନ କରାଯାଇଥିଲା | ପରିଷଦର ରାଷ୍ଟ୍ରୀୟ ଅଧ୍ୟକ୍ଷ ଅଲେଖ ଚନ୍ଦ୍ର ଜେନା, ମିଲନ ପ୍ରଧାନ,ନିରଞ୍ଜନ ସାହୁ, ସୀତାଂଶୁ ମହାନ୍ତି, ସୁକାନ୍ତ ମହାନ୍ତି ସ୍ଥାନୀୟ ସାମାଜିକ କର୍ମୀ ମୁକେଶ ରାଉତ ଓ ପ୍ରଭୁ ପଡ଼ିଆରି,ପ୍ରମୁଖ ଉପସ୍ଥିତ ରହି କମ୍ବଳ ପ୍ରଦାନ କରିବା ସହ ଲୋକମାନଙ୍କ ସହ ଭାବ ବିନିମୟ କରିଥିଲେ | ଗାଁ ର ଲୋକମାନଙ୍କ ସହ କଥା ହୋଇ ଜଣାପଡିଲା ଯେ, ଏହି ଗାଁ ରେ ଏବେବି ଇଲେକ୍ଟ୍ରି ନାହଁ | ମୋବାଇଲ ନେଟୱର୍କ ଆସୁନଥିବାରୁ ପିଲାମାନେ ପାଠପଢ଼ାରୁ ବଂଚିତ | ପିଇବା ପାଣି କଥା ନକହିଲେ ଭଲ | ରାଜଧାନୀରୁ ମାତ୍ର 15 କିଲୋମିଟର ଦୂରରେ ଥିବା ଏହି ଗାଁ ପ୍ରତି ପ୍ରଶାସନର ଦୃଷ୍ଟି ନରହିବା ସ୍ଥାନୀୟ ସରକାରୀ ବ୍ୟବସ୍ଥାର ଅପାରଗତାକୁ ଆଙ୍ଗୁଳି ନିର୍ଦେଶ କରୁଛି | ପରିଷଦ ପକ୍ଷରୁ ଗାଁ ଲୋକଙ୍କ ସହ ଆଲୋଚନା କରାଯାଇ ଏବିଷୟରେ ସ୍ଥାନୀୟ ପ୍ରଶାସନର ତୁରନ୍ତ ଦୃଷ୍ଟି ଆକର୍ଷଣ କରାଯିବ ବୋଲି ନିଷ୍ପତ୍ତି ହୋଇଥିଲା |
