କନ୍ଧମାଳ ( ଆୱାଜ ମିଡ଼ିଆ ) ସଞ୍ଜୟ କୁମାର ପାଣିଗ୍ରାହୀ : ୩ ବର୍ଷର ନାତିକୁ ଉଦ୍ଧାର କରିବାକୁ ଯାଇ ଜେଜେ ମା’ଙ୍କର ବିଦ୍ୟୁତ ଆଘାତରେ ମୃତ୍ୟୁ ଘଟିଛି। ଏଭଳି ଦୁଃଖଦାୟକ ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ବାଲିଗୁଡା ଉପଖଣ୍ଡ ଅନ୍ତର୍ଗତ ଦାରିଙ୍ଗବାଡି ଥାନା ସୋନପୁର ଗ୍ରାମରେ । ମୃତା ବୃଦ୍ଧା ହେଲେ ୬୦ ବର୍ଷୀୟା ସନ୍ଧ୍ୟାବାଲି ବେହେରଦଳେଇ । ଦାରିଙ୍ଗବାଡି ପୋଲିସ ଖବର ପାଇ ଘଟଣା ସ୍ଥଳରେ ପହଞ୍ଚି ଶବ ଜବତ କରିବା ସହ ତଦନ୍ତ ଆରମ୍ଭ କରିଛି । ସୂଚନା ମୁତାବକ ସୋନପୁର ଗ୍ରାମର ଉପର ସାହିରେ ରହୁଥିବା ତେମଶ ବେହେରଦଳେଇଙ୍କ ୩ ବର୍ଷର ପୁଅ ଭୁଲେଶ୍ୱର ଅପରାହ୍ନରେ ଘରେ ଥିବା ଏକ ବିଦ୍ୟୁତ ବୋର୍ଡ଼ରେ ହାତ ମାରି ଦେଇଥିଲେ। ଯାହା ଫଳରେ ତାକୁ ବିଦ୍ୟୁତ ଆଘାତ ଲାଗିଥିଲା । ସେହି ସମୟରେ ଭୁଲେଶ୍ୱରଙ୍କ ଜେଜେମା ଗାଧୋଇବାକୁ ଯାଇ ଓଦା ଲୁଗାରେ ଘରକୁ ଫେରି ନାତିକୁ ଏପରି ବିପଦରେ ପଡିଥିବାର ଦେଖିଥିଲେ । ଆଉ ସେହି ଓଦା ଅବସ୍ଥାରେ ସନ୍ଧ୍ୟାବାଲି ନିଜ ନାତିକୁ ବିଦ୍ୟୁତ ଆଘାତରୁ ଉଦ୍ଧାର କରିବାକୁ ଯାଇଥିଲେ । ବିଦ୍ୟୁତ କବଜାରୁ ନାତିକୁ ଉଦ୍ଧାର କରିବାରେ ଜେଜେମା ସନ୍ଧ୍ୟାବାଲି ସକ୍ଷମ ହୋଇଥିଲେ କିନ୍ତୁ ବିଦ୍ୟୁତ ଆଘାତରେ ନିଜେ ଗୁରୁତର ହୋଇ ଯାଇଥିଲେ । ପରିବାର ଲୋକ ସନ୍ଧ୍ୟାବାଲିଙ୍କୁ ଗୁରୁତର ଅବସ୍ଥାରେ ଦାରିଙ୍ଗବାଡି ମେଡିକାଲରେ ଭର୍ତ୍ତି କରାଇଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
