କଟକ ( ଆୱାଜ ମିଡ଼ିଆ ) – ପ୍ରିୟବ୍ରତ ପଟ୍ଟନାୟକ : କଟକ ସଦର ଉପକଣ୍ଠ କନ୍ଦରପୁର ପଞ୍ଚାୟତ ବମ୍ବୁରି ଗ୍ରାମର କରୋନା ଯୋଦ୍ଧା ଅଭିରାମ ସାହୁ ଉଲ୍ଲେଖନୀୟ କୃତିତ୍ୱ ନିମନ୍ତେ ବିଶ୍ଵସ୍ଵାସ୍ଥ୍ୟ ସଂଗଠନ ଦ୍ୱାରା ସମ୍ମାନୀତି ହୋଇ ସମଗ୍ର ଅଞ୍ଚଳ ପାଇଁ ଗର୍ଵ ଓ ଗୌରବ ଆଣି ପାରିଛନ୍ତି । ସୂଚନାଯୋଗ୍ୟ କରୋନା ମହାମାରୀ ସମୟରେ କୋଭିଡ଼ -୧୯ର ସମସ୍ତ କାର୍ଯ୍ୟକାରୀ ଯୋଜନା, ପ୍ରସ୍ତୁତି ପ୍ରଣାଳୀ ଏବଂ ଦେଶ ଭିତ୍ତିଭୂମି ଗଠନରେ ଅକୁଣ୍ଠ ସହଯୋଗ, କରୋନା ସଚେତନତା ଆଦି ନିୟମ ଧାରାକୁ ସୂଚାରୁ ରୂପେ ସମ୍ପାଦନ କରି ମହାମାରୀର ଦୃଢ ମୁକାବିଲାରେ ସହାୟ ହୋଇ ପାରିଛନ୍ତି । ଶ୍ରୀଯୁକ୍ତ ସାହୁ ଅଧୁନା କଟକ ଜିଲ୍ଲାର ଅଗ୍ରଣୀ ସାଂସ୍କୃତିକ ଅନୁଷ୍ଠାନ “ସରସ୍ୱତୀ କଳା ପରିଷଦ”ର ଉପଦେଷ୍ଟା ମଣ୍ଡଳୀର ସଦସ୍ୟ, କନ୍ଦରପୁର ବଜାରରେ ଅବସ୍ଥାପିତ ମହାବୀର ଔଷଧାଳୟର ନିର୍ଦ୍ଦେଶକ ଭାବେ କାର୍ଯ୍ୟରତ ଅଟନ୍ତି . ଏଥି ସହ ଜଣେ ସ୍ୱାସ୍ଥ୍ୟକର୍ମୀ, କଳାପ୍ରେମୀ, ସମାଜ ସଂସ୍କାରକ, ପରୋପକାରୀ ଦରଦୀ ମଣିଷ ଭାବେ ସମସ୍ତଙ୍କର ପ୍ରିୟଭାଜନ ହୋଇ ପାରିଛନ୍ତି . ତାଙ୍କ ସାଧନାର ସ୍ୱିକୃତୀ ସ୍ୱରୂପ ମୁହାଁଣ ସାହିତ୍ୟ ସଂସଦ – ମୁମ୍ବାଇ, ଦୟାନିଧି ପ୍ରତିଭା ବିକାଶ ପ୍ରତିଷ୍ଠାନ – ବୟାଳିଶମୌଜା, ସ୍ଵର୍ଗତ ବସନ୍ତ ଜେନା ସ୍ମୃତି ସଂସଦ – ଦାମୋଦରପୁର, ଉତ୍କଳ ବିକାଶ ପରିଷଦ – କଟକ ସଦର ଆଦି ବିଭିନ୍ନ ସଙ୍ଗଠନ ଦ୍ଵାରା ସେ ସମ୍ବର୍ଦ୍ଧିତ ହୋଇଛନ୍ତି ।
