ଭୁବନେଶ୍ୱର ( ଆୱାଜ ମିଡ଼ିଆ ) – ନିରଞ୍ଜନ ସାହୁ : ଉତ୍କଳ ଦିବସରେ ଓଡିଶା ତଥା ଓଡ଼ିଆ ଜାତି ପ୍ରତି ଅଶାଳୀନ ଭାଷା ପ୍ରୟୋଗ କରି ଅପମାନିତ କରିଥିବା ବିଛିନ୍ନତାବାଦୀ ସଂଗଠନ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦାବି କରି ଡିଜିପି ଓଡିଶା ପୋଲିସ୍ ଙ୍କୁ ଦାବିପତ୍ର ପ୍ରଦାନ . ଗତ ଅପ୍ରେଲ ୧ ତାରିଖରେ ସମଗ୍ର ଓଡ଼ିଆ ଜାତି ବିଶ୍ୱର କୋଣ ଅନୁକୋଣରେ ଉତ୍କଳ ଦିବସ ପାଳନ କରୁଥିବା ବେଳେ ଏକ ଦୁଖଦଃ ତଥା ନିନ୍ଦନୀୟ ଘଟଣା ଘଟିଛି | ସୋସିଆଲ ମିଡିଆରେ ଘୁରି ବୁଲୁଥିବା ଏକ ଭିଡିଓରେ ଦେଖାଯାଉଛି କି କିଛି ଅସାମାଜିକ ଶ୍ରେଣୀୟ ଯୁବକ ଉତ୍କଳ ଦିବସ ପାଳନର ବ୍ୟାନରକୁ ଚିରିବା ସହ ‘ଗୋ ବ୍ୟାକ ଓଡିଶା’, ; ଓଡିଶା ଛି ଛି , ଥୁ ଥୁ ଭଳି ଅତ୍ୟନ୍ତ ଅରୁଚିକର ସ୍ଲୋଗାନ ଦେଉଛନ୍ତି | ଭିଡିଓ ରେ ସ୍ପଷ୍ଟ ଜଣାପଡୁଛି ଯେ , ୱେଷ୍ଟର୍ଣ୍ଣ ଓଡିଶା ଯୁବ ମଞ୍ଚ ଲେଖା ଯାଇଥିବା ଡ୍ରେସ ପିନ୍ଧି ଏହି ଯୁବକ ମାନେ କିଛି ସମୟ ଏଭଳି ଆତଙ୍କ ସୃଷ୍ଟି କରି ଚାଲିଛନ୍ତି | ବରଗଡ଼ ଜିଲ୍ଲା ପୌର ପରିଷଦ ପକ୍ଷରୁ ଲଗାଯାଇଥିବା ଉତ୍କଳ ଦିବସ ଓ ଆହାର ସପ୍ତମ ବାର୍ଷିକ କାର୍ଯ୍ୟକ୍ରମ ବ୍ୟାନର ଟିକୁ ଏହି ଦୁର୍ବୁତ୍ତ ମାନେ ଚିରି ଦେବା ସହ ଓଡ଼ିଆ ଜାତିର ସ୍ୱାଭିମାନ ଓ ଅସ୍ମିତାକୁ କ୍ଷତାକ୍ତ କଲା ଭଳି ଶବ୍ଦ ପ୍ରୟୋଗ କରି ଗାଳି କରିଥିଲେ ଯାହା କଦାପି ଗ୍ରହଣଯୋଗ୍ୟ ନୁହେଁ | ପ୍ରଥମ ଭାଷା ଭିତ୍ତିକ ରାଜ୍ୟ ଭାବେ ସ୍ୱୀକୃତି ମିଳିବା ପର ଠାରୁ ଯେଉଁ ସ୍ୱାଭିମାନ ଟିକକ ଆମ ଓଡ଼ିଆ ଲୋକଙ୍କ ଗର୍ବ ପାଲଟିଛି ତାହାକୁ ଧ୍ବଂସ କରିବାକୁ କିଛି ଉଗ୍ର ଆଞ୍ଚଳିକବାଦ ବିଚାରରେ ପୀଡିତ ବ୍ୟକ୍ତି ବିଶେଷ ଓ ଅନୁଷ୍ଠାନ ବାରମ୍ବାର ଚେଷ୍ଟା କରୁଛନ୍ତି | କିଛି ନ୍ୟସ୍ତ ସ୍ୱାର୍ଥ ବ୍ୟକ୍ତି ନିଜର କ୍ଷମତା ଲାଳସା ଯୋଗୁ ଏଭଳି ଅକ୍ଷମଣୀୟ ଅପରାଧକୁ ପ୍ରଶୟ ଦେଉଛନ୍ତି | ଆଗରୁ ମଧ୍ୟ ବହୁଥର ଏଭଳି ଅପଚେଷ୍ଟା କରାଯାଇଛି | ସେମାନେ ଭୁଲି ଯାଉଛନ୍ତି ସାରା ଓଡିଶା ହେଉଛି ଆମର ମା | ନିଜ ମା ପ୍ରତି ହେଉଥିବା ଅପମାନକୁ ତାର କେହି ବି ସନ୍ତାନ ସହ୍ୟ କରିବେ ନାହିଁ | ଆଜି ଜନମଙ୍ଗଳ ପରିଷଦ ପକ୍ଷରୁ ରାଜଧାନୀରେ ଏହାର ପ୍ରତିବାଦ କରିବା ସହ ଏଭଳି ଉଗ୍ର ଆଞ୍ଚଳିକବାଦ ଓ ବିଛିନ୍ନତାବାଦୀ ସଂଗଠନ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବୀ କରାଯାଇଛି . ଯାହା ଆଗାମୀ ଦିନରେ ଓଡ଼ିଶାର ସ୍ୱାଭିମାନ ଓ ଅଖଣ୍ଡତା ବଜାୟ ରଖିବାରେ ଭବିଷ୍ୟତ ପିଢ଼ିଙ୍କୁ ଉତ୍ସାହିତ କରିବ ବୋଲି ସଂଗଠନ ତରଫରୁ ଆଶା କରାଯାଇଛି | ଜନମଙ୍ଗଳ ପରିଷଦ ଏହି ଘଟଣାର ଦୃଢ଼ ଭାବେ ନିନ୍ଦା କରିବା ସହ , ଯଦି ଦୋଷୀ ମାନଙ୍କୁ କଠୋର ଦଣ୍ଡରେ ଦଣ୍ଡିତ ନକରାଯାଏ ତେବେ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବା ସହ ଏହାକୁ ଏକ ବିରାଟ ଜନ ଆନ୍ଦୋଳନର ରୂପ ଦେଇ ଏହାର ଦୃଢ଼ ଜବାବ ଦିଆଯିବ ବୋଲି ଅନୁଷ୍ଠାନର କର୍ମକର୍ତ୍ତା ପ୍ରକାଶ କରିଛନ୍ତି |
