ବାଣପୁର ( ଆୱାଜ ମିଡ଼ିଆ ) – ରାକେଶ ସାହୁ : ଚଳିତ ବର୍ଷ ପ୍ରଥମ ଥର ପାଇଁ ଖୋର୍ଦ୍ଧା ଜିଲ୍ଲା ବାଣପୁରର ଅଧିଷ୍ଠାତ୍ରୀ ଦେବୀ ମା ଭଗବତୀଙ୍କ ପୀଠରେ ନଅ ଦିନ ବ୍ୟାପୀ ବାସନ୍ତୀକ ନବରାତ୍ରି ବିଶ୍ୱଶାନ୍ତି ମହାଯଜ୍ଞ ଆୟୋଜିତ ହେଉଛି । ଚୈତ୍ର ଶୁକ୍ଳ ପ୍ରତିପଦା ୨୨ ତାରିଖ ଠାରୁ ଆରମ୍ଭ ହୋଇଥିବା ଏହି ଯଜ୍ଞ ଆସନ୍ତା ୩୦ ତାରିଖ ଗୁରୁବାର ଦିନ ପୂର୍ଣ୍ଣାହୁତି ହେବ । ଯଜ୍ଞର ପ୍ରଥମ ଦିନ କଳସ ଶୋଭାଯାତ୍ରାରେ ବାଣପୁର ଅଞ୍ଚଳର ବହୁ ଶ୍ରଦ୍ଧାଳୁ ସାମିଲ ହୋଇଥିଲେ l ଦକ୍ଷେଶ୍ୱରଙ୍କ ମନ୍ଦିର ପରିସର ପୁଷ୍କରିଣୀରୁ ରୁ କଳସରେ ଜଳ ଆଣି ବାଣପୁର ନଗର ପରିକ୍ରମା କରି ଭଗବତୀଙ୍କ ମନ୍ଦିରରେ ପହଞ୍ଚିଥିଲେ । ବୁଧବାର ଦିନ କଳସ ଯାତ୍ରା ସମାପନ ହୋଇଥିଲା । ଗୁରୁବାର ଅଧିବାସ ପର ଠାରୁ ଯଜ୍ଞ ଆରମ୍ଭ ହେଇଛି । ଯଜ୍ଞରେ ଦୈନିକ ଚଣ୍ଡୀପାଠ, ରାମଚରିତ ମାନସ ପଠନ, ଭଜନ ସମାରୋହ ଏବଂ ପ୍ରତ୍ୟେହ ମା’ ଭଗବତୀଙ୍କ ବାପଘର ଶ୍ରୀ ଦକ୍ଷେଶ୍ୱରଙ୍କ ନିକଟରେ ରୁଦ୍ରାଭିଷେକ ହେଉଥିବା ବେଳେ ଆସନ୍ତା ୩୦ ତାରିଖ ଗୁରୁବାର ପର୍ଯ୍ୟନ୍ତ ଏହା ଚାଲୁ ରହିବ । ପ୍ରତ୍ୟେକ ଦିନ ଶ୍ରଦ୍ଧାଳୁ ମାନଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା ହେଉଥିବା ବେଳେ ସନ୍ଧ୍ୟା ସମୟରେ ଭଜନ ସମାରୋହ ଅନୁଷ୍ଠିତ ହେଉଛି ।
