ନୟାଗଡ ( ଆୱାଜ ମିଡ଼ିଆ ) – ବିଶ୍ବଭୂଷଣ ମହାପାତ୍ର : ନୟାଗଡ଼ ଟାଉନ ଥାନା ଅନ୍ତର୍ଗତ ଝୁମ୍ପୁରି ଛକଠାରେ ଦୁଇ ପଲ୍ସର ବାଇକ ମୁହାଁମୁହିଁ ଧକା ହୋଇଛି । ଦୁର୍ଘଟଣା ଅତି ଭୟଙ୍କର ହୋଇଛି । ଯେଉଁଥିରେ ବାପ ପୁଅ ମୁତ୍ୟୁ ବରଣ କରିଛନ୍ତି । ଗୋଟିଏ ଛୋଟ ଛୁଆ ଅତି ସଙ୍କଟାପର୍ଣ୍ଣ ହୋଇଛି । ଏଥି ସହ ୨ ଜଣ ଯୁବକ ଗୁରୁତର ହୋଇଛନ୍ତି । ଦୁଇ ଛୋଟ ଛୁଆ ସମେତ ଦୁଇ ଯୁବକଙ୍କୁ ଭୁବନେଶ୍ୱର ସ୍ଥାନାନ୍ତରିତ କରାଯାଇଥିବା ବେଳେ ବାଟରେ ସାନ ପୁଅର ମୃତ୍ୟୁ ହୋଇଛି । ସୁଚନାନୁସାରେ ସନ୍ଧ୍ୟା ସମୟରେ ହାଟଦ୍ୱାର ଗ୍ରାମର ପୂର୍ଣ୍ଣଚନ୍ଦ୍ର ନାହାକ ଓ ତାଙ୍କ ପତ୍ନୀ ରୀନା ନାହାକ ଦୁଇ ପୁଅ ବିଜୟ ନାହାକ (୮) ସଞ୍ଜୟ ନାହାକ(4) ନିଜ ଗ୍ରାମରୁ ନୟାଗଡ଼ ସହରକୁ ଡ୍ରେସ କିଣିବାକୁ ଆସୁଥିଲେ । ଏହି ସମୟରେ ନୟାଗଡ଼ ପଟୁ କିରିଆଲାଞ୍ଜି ଗ୍ରାମର ରୋହିତ କୁମାର ରାଉତ ଓ ଗୋପିନାଥପୁର ଗ୍ରାମର ଜଗନ୍ନାଥ ବରାଡ ଅନ୍ୟ ଏକ ପଲ୍ସର ଗାଡିରେ ଆସୁଥିବା ବେଳେ ଉଭୟେ ମୁହାଁମୁହିଁ ଧକା ହୋଇଥିଲା । ଘଟଣା ସ୍ଥଳରେ ଲୋକମାନେ ରୁଣ୍ଡ ହୋଇ ଆମ୍ବୁଲାନ୍ସ ଯୋଗେ ସମସ୍ତଙ୍କୁ ନୟାଗଡ଼ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରିଥିଲେ । ମୁଖ୍ୟ ଚିକିତ୍ସାଳୟରେ ଡାକ୍ତର ପୂର୍ଣ୍ଣଚନ୍ଦ୍ର ନାହାକଙ୍କୁ ମୃତ ଘୋଷଣା କରିଥିଲେ । ଦୁଇ ଗୋଟି ଛୋଟ ଛୁଆ ଅତି ସଙ୍କଟାପନ୍ନ ଅବସ୍ଥାରେ ଭୁବନେଶ୍ୱରକୁ ସ୍ଥାନାନ୍ତରିତ କରାଯାଇଥିବା ବେଳେ ବାଟରେ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଅନ୍ୟ ଏକ ପକ୍ଷେ ଉଭୟ ଯୁବକ ମଧ୍ୟ ଗୁରୁତର ହୋଇ ପଡିଛନ୍ତି । ପୂର୍ଣ୍ଣଚନ୍ଦ୍ର ନାହାକଙ୍କ ପତ୍ନୀ ରୀନା ନାହାକ ଅଳ୍ପ ଆହତ ହୋଇ ଦୁଇ ଛୁଆଙ୍କୁ ଜଗି ବସିଥିଲେ । କାନ୍ଦ ବୋବାଳିରେ ଫାଟି ପଡୁଛି । ନୟାଗଡ଼ ଟାଉନ ଥାନା ଆଇଆଇସି ଘଟଣାସ୍ଥଳରେ ପହଞ୍ଚି ତନାଘନା କରୁଛନ୍ତି ।
