ନୟାଗଡ ( ଆୱାଜ ମିଡ଼ିଆ ) – ସ୍ୱରୂପ ପଟ୍ଟନାୟକ : ନୟାଗଡ଼ ଜିଲ୍ଲା ଆଇନ ସେବା ପ୍ରାଧିକରଣ, ପକ୍ଷରୁ ଆଜି ନୟାଗଡ଼ ଜିଲ୍ଲା ଆଦାଲତ ପରିସରରେ ଜାତୀୟ ଏକତା ଦିବସ (National Unity Day) ପାଳନ କରାଯାଇଛି। ଲୌହମାନବ ଅଖଣ୍ଡ ଭାରତର ନିର୍ମାତା ସର୍ଦ୍ଦାର ବଲ୍ଲଭଭାଇ ପଟେଲଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ ପୂର୍ବକ ରାଷ୍ଟ୍ରୀୟ ଏକତା ଦିବସ ପାଳନ ହୋଇଥିଲା।
ଏହି ଅବସରରେ ନୟାଗଡ଼ କ୍ୟାମ୍ପସ୍ସ୍ଥିତ ଜିଲ୍ଲା ସେବା ସଦନର ବିଚାର ବିଭାଗୀୟ ଅଧିକାରୀ ସମେତ ବାର ଆସୋସିଏସନର ସଦସ୍ୟବୃନ୍ଦ, ଅଦାଲତର କର୍ମଚାରୀ, ଜିଲ୍ଲା ଆଇନ ସେବା ପ୍ରାଧିକରଣର କର୍ମଚାରୀ ଏବଂ ପାରା ଲିଗାଲ୍ ସ୍ୱେଚ୍ଛାସେବୀ (PLVs) ଉପସ୍ଥିତ ରହିଥିଲେ।
ସର୍ବପ୍ରଥମେ ରାଷ୍ଟ୍ରୀୟ ଏକତା ଦିବସର ମହତ୍ତ୍ୱ, ଦେଶର ଅଖଣ୍ଡତା, ସାର୍ବଭୌମତ୍ୱ ଓ ସାମାଜିକ ସମ୍ପ୍ରୀତି ରକ୍ଷାରେ ଏକତାର ଭୂମିକା ସମ୍ପର୍କରେ ଆଲୋଚନା କରାଯାଇଥିଲା। ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜୀବନ ଏବଂ ଭାରତ ଗଠନରେ ତାଙ୍କର ଅବଦାନ ଉପରେ ମଧ୍ୟ ଆଲୋକପାତ କରାଯାଇଥିଲା।
ଭାଷା, ଧର୍ମ, ଜାତି, ସଂସ୍କୃତି ଓ ଆଞ୍ଚଳିକ ବିବିଧତା ସତ୍ତ୍ୱେ ଭାରତର ସମସ୍ତେ କିପରି ଏକ ସୂତ୍ରରେ ବାନ୍ଧି ହୋଇ ରହିଛନ୍ତି ଏବଂ ଦେଶର ଏକତା ଓ ଅଖଣ୍ଡତାକୁ ସୁଦୃଢ଼ କରିବାରେ ନାଗରିକଙ୍କ ଭୂମିକା କେତେ ଗୁରୁତ୍ୱପୂର୍ଣ୍ଣ, ସେ ବିଷୟରେ ଉପସ୍ଥିତ ସମସ୍ତଙ୍କୁ ସଚେତନ କରାଯାଇଥିଲା।
ପରିଶେଷରେ ସମସ୍ତେ ଦେଶର ଏକତା, ଅଖଣ୍ଡତା ଓ ସାର୍ବଭୌମତ୍ୱ ରକ୍ଷା ପାଇଁ ଶପଥ ଗ୍ରହଣ କରିଥିଲେ। କାର୍ଯ୍ୟକ୍ରମଟି ଜିଲ୍ଲା ଆଇନ ସେବା ପ୍ରାଧିକରଣ, ନୟାଗଡ଼ର ସଚିବଙ୍କ ନେତୃତ୍ୱରେ ଆୟୋଜିତ ହୋଇଥିଲା। ସମସ୍ତ ଅଂଶଗ୍ରହଣକାରୀ ରାଷ୍ଟ୍ରୀୟ ଏକତାର ଆଦର୍ଶକୁ ନିଜ ଜୀବନରେ ପାଳନ କରିବା ଏବଂ ସମାଜରେ ଏକତାର ବାର୍ତ୍ତା ପ୍ରଚାର କରିବାକୁ ସଂକଳ୍ପବଦ୍ଧ ହୋଇଥିଲେ।
