ଜଗତସିଂହପୁର ( ଆୱାଜ ମିଡ଼ିଆ ) – ସୁନୀଲ କୁମାର ଲେଙ୍କା : ମଦ ଟେଣ୍ଡର କୁ କେନ୍ଦ୍ର କରି ଗତ ୭ ତାରିଖ ରାତିରେ ଘଟିଥିବା ବୋମାମାଡର ମୁଖ୍ୟ ଅଭିଯୁକ୍ତ ସହିତ ତାର ସହଯୋଗୀ କୁ ଗିରଫ କରିଛି ଜଗତସିଂହପୁର ପୋଲିସ। ମୁଖ୍ୟ ଅଭିଯୁକ୍ତ ହେଲେ ପାଣିଶାଳିଆ ଅଞ୍ଚଳର ଦିଗଦର୍ଶନ ବଳ (କାଳିଆ) । କାଳିଆ ନାଁରେ ପୂର୍ବରୁ ଜଗତସିଂହପୁର ଥାନାରେ ଏକାଧିକ ଅପରାଧିକ ମାମଲା ରହିଛି । ଜଗତସିଂହପୁର ଏସଡିପିଓ ଏକ ସାମ୍ବାଦିକ ସମ୍ମିଳନୀ କରି ଏହି ସୂଚନା ଦେଇଛନ୍ତି । ଗତ ୭ତାରିଖରେ ଦେଶୀ ଓ ବିଦେଶୀ ମଦ ଦୋକାନ ପାଇଁ ଟେଣ୍ଡର ହୋଇଥିଲା । ତେବେ ବାଲିକୁଦା ମଦ ଦୋକାନ ପାଇଁ ଟେଣ୍ଡର ପାଇଥିବା ବିଶ୍ୱଜିତ ପୋଥାଳଙ୍କୁ ଅଭିଯୁକ୍ତ କାଳିଆ ତାକୁ ଅଂଶୀଦାର ରଖିବା ପାଇଁ ଧମକ ଦେବା ସହିତ ବିଶ୍ୱଜିତଙ୍କ କୁକୁଡ଼ା ଦାନା ଦୋକାନ ଓ ହାଚେରୀ ଉପରେ ସ୍ୱଳ୍ପ ସମୟ ବ୍ୟବଧାନରେ ବୋମାମାଡ଼ କରିଥିବା ନେଇ ଅଭିଯୋଗ ହୋଇଥିଲା । ତେବେ ଏହି ଘଟଣାରେ ସିସିଟିଭି ଫୁଟେଜ ଆଧାରରେ ପୋଲିସ ମୁଖ୍ୟ ଅଭିଯୁକ୍ତ କାଳିଆ ସମେତ ତାର ଜଣେ ସହଯୋଗୀ କୁ ଗିରଫ କରିଥିବା ବେଳେ ଅନ୍ୟ ଅଭିଯୁକ୍ତ ମାନଙ୍କୁ ଖୁବ ଶୀଘ୍ର ଗିରଫ କରିବ ବୋଲି ସୂଚନା ଦେଇଛି ।
