ଢେଙ୍କାନାଳ ( ଆୱାଜ ମିଡ଼ିଆ ) – ରଞ୍ଜିତ ବେହେରା : ବ୍ୟାଙ୍କରେ ଗ୍ରାହକ ମାନଙ୍କ ବିଶ୍ୱାସରେ ବିଷ ଦେଇ ଲକ୍ଷାଧିକ ଟଙ୍କା ହଡପ । ଏପରିକି ଗ୍ରାହକଙ୍କ କ୍ରେଡିଟ କାର୍ଡ଼ରେ ଫ୍ରଡ଼ କରିଛନ୍ତି ଖୋଦ୍ ବ୍ୟାଙ୍କ କର୍ମଚାରୀ । ଆଉ ଧରା ପଡିଯିବା ପରେ ଏଚଡିଏଫସି ବ୍ୟାଙ୍କର ଜଣେ ଆସିଷ୍ଟାଣ୍ଡ ମ୍ୟାନେଜରଙ୍କୁ ଢେଙ୍କାନାଳ ଟାଉନ ପୋଲିସ ବାନ୍ଧି କୋର୍ଟ ଚାଲାଣ କରିଛି । ଗିରଫ ବ୍ୟାଙ୍କ କର୍ମଚାରୀ ଜଣଙ୍କ ଢେଙ୍କାନାଳ ସହରସ୍ଥିତ ଏଚଡିଏଫସି ବ୍ୟାଙ୍କର ଆସିଷ୍ଟାଣ୍ଟ ମ୍ୟାନେଜର ମନୋଜ ପଟ୍ଟନାୟକ ବୋଲି ଜଣାପଡ଼ିଛି । ସୂଚନାଯୋଗ୍ୟ ଯେ, ତପନ ବାରିକ ନାମକ ଜଣେ ରେଳବାଇ କର୍ମଚାରୀ ତାଙ୍କ କ୍ରେଡିଟ କାର୍ଡ଼କୁ ବ୍ୟାଙ୍କରେ ଦାଖଲ କରି ସାରିଥିଲେ । ମାତ୍ର ବ୍ୟାଙ୍କର କ୍ରେଡିଟ୍ କାର୍ଡ ସେକ୍ସନ ଦାୟିତ୍ୱରେ ଥିବା ଏହି ବ୍ୟାଙ୍କ ସହକାରୀ ପରିଚାଳକ ଜଣଙ୍କ ଚଞ୍ଚକତାର ସହ ପୁନର୍ବାର ନିଜ ମୋବାଇଲ ନମ୍ବର ପକାଇ ଚାଲୁ କରାଇ ଗ୍ରାହକଙ୍କ ନାମରେ ଟଙ୍କା ଉଠାଇ ଚାଲିଥିଲେ । ସେହିପରି ଢେଙ୍କାନାଳ ସଦର ଥାନା ବାଲ୍ୟମ୍ବା ଗ୍ରାମର ଦିଜ୍ଵବର ସାହୁ ନାମକ ଅନ୍ୟ ଜଣେ ଗ୍ରାହକଙ୍କ ନାମରେ କ୍ରେଡିଟ କାର୍ଡ ଦେଖାଇ ୩ ଲକ୍ଷ ଟଙ୍କା ଉଠାଇ ନେଇଥିବା ଜଣାପଡିଛି । ଅଭିଯୋଗ ପାଇ ଟାଉନ ଥାନା ପୋଲିସ ଯାଞ୍ଚରୁ ଏହି ବ୍ୟାଙ୍କ କର୍ମଚାରୀ ଜଣଙ୍କ କ୍ରେଡିଟ୍ କାର୍ଡ ଦ୍ୱାରା ଗ୍ରାହକ ମାନଙ୍କର ଲକ୍ଷ ଲକ୍ଷ ଟଙ୍କା ହଡପ କରିଥିବା ପଦାକୁ ଆସିଛି । ଫଳରେ ଟାଉନ ଥାନା ପୋଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଛି । ତାଙ୍କ ଜାମିନ ନାମଞ୍ଜୁର ହେବାରୁ ଉକ୍ତ ବ୍ୟାଙ୍କ କର୍ମଚାରୀଙ୍କୁ ଜେଲ୍ ହାଜତକୁ ପଠାଇ ଦିଆଯାଇଥିବା ଜଣାପଡିଛି ।
