ବାଣପୁର ( ଆୱାଜ ମିଡ଼ିଆ ) – ରାକେଶ ସାହୁ : ବାଲୁଗାଁ ଅବକାରୀ ବିଭାଗ ଗତକାଲି ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଏକାଧିକ ସ୍ଥାନରେ ଚଢ଼ାଉ କରି ଦୁଇ ଜଣ ଦେଶୀ ମଦ ବେପାରୀଙ୍କୁ ଗିରଫ କରିବା ସହିତ ତାଙ୍କ ନିକଟରୁ ଏକ ବାଇକ ଜବତ କରିଛି । ଖବର ମୁତାବକ ବାଲୁଗାଁ ଅବକାରି ଅଧିକାରୀ ରଞ୍ଜନ ଦାସ ପୂର୍ବାହ୍ନରେ ନିଜ ଟିମ ସହ କଲେଜ ଛକ ନିକଟରୁ ୩୦ ଲିଟର ଦେଶୀ ମଦ ସମେତ ରମେଶ ବେହେରା ନାମକ ଅଭିଯୁକ୍ତଙ୍କୁ ଗିରଫ କରିଥିଲେ । ତାଙ୍କ ନିକଟରୁ ଏକ ବାଇକ ମଧ୍ୟ ଜବତ ହୋଇଛି । ସେହିପରି ଭାବେ ମଧ୍ୟାହ୍ନରେ ଅଚ୍ୟୁତରାଜପୁର ଗ୍ରାମରୁ ସୁରେନ୍ଦ୍ର ପ୍ରଧାନ ନାମକ ଦେଶୀ ମଦ ବେପାରୀଙ୍କୁ ଗିରଫ କରିବା ସହ ତାଙ୍କ ନିକଟରୁ ୩୫ ଲିଟର ଦେଶୀ ମଦ ଜବତ କରିଛି ଅବକାରୀ ବିଭାଗ । ଏ ସଂକ୍ରାନ୍ତରେ ପିଆର ନମ୍ବର ୧୦୦ ଏବଂ ୧୦୧ ରେ ଦୁଇ ଗୋଟି ପୃଥକ ମାମଲା ରୁଜୁ କରାଯାଇ ଆଜି କୋର୍ଟ ଚାଲାଣ କରାଯାଇଥିବାର ବାଲୁଗାଁ ଅବକାରୀ ଅଧିକାରୀ ରଞ୍ଜନ ଦାସ ସୂଚନା ଦେଇଛନ୍ତି । ଉକ୍ତ ଚଢ଼ାଉରେ ଅବକାରୀ ଏଏସଆଇ ବିଶ୍ୱମ୍ଭର ବିଶ୍ୱାଳ ଏବଂ ଅନ୍ୟ କର୍ମଚାରୀ ମାନେ ସାମିଲ ଥିଲେ ।
