ବାଣପୁର ( ଆୱାଜ ମିଡ଼ିଆ ) – ରାକେଶ ସାହୁ : ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ପାରିନୂଆଗାଁ ଛକରେ ଏକ ଲୁଟ ହୋଇଛି । ସୂଚନା ମୁତାବକ ଆଜି ଅପରାହ୍ନରେ ବେଲପଡା ଗ୍ରାମ କବିରାଜ ଲେଙ୍କାଙ୍କ ଝିଅ ସୁନିତା ଲେଙ୍କା ବାଣପୁର ପଲଟନ ପଡିଆରୁ କାମ ସାରି ନିଜ ସାଇକେଲ ଯୋଗେ ଘରକୁ ଫେରୁଥିଲେ । ଠିକ ସେହି ସମୟରେ ପାରିନୁଆଗାଁ କେନାଲ ଛକରେ ହଠାତ ଦୁଇ ଜଣ ଯୁବକ ଏକ ବାଇକରେ ଆସି ସୁନିତାଙ୍କ ଭ୍ୟାନିଟି ବ୍ୟାଗ ଛଡାଇ ଫେରାର ହୋଇ ଯାଇଥିଲେ । ଭ୍ୟାନିଟି ବ୍ୟାଗରେ ଦୁଇ ଗୋଟି ମୋବାଇଲ , ୧ ହଜାର ଟଙ୍କା ଏବଂ ଅନ୍ୟାନ୍ୟ ଜରୁରୀ କାଗଜପତ୍ର ଥିବା ସୁନିତା କହିଛନ୍ତି । ଏ ନେଇ ସୁନିତା ବାଣପୁର ଥାନାରେ ଜଣାଇବାରୁ ପୋଲିସ ତଦନ୍ତ ଆରମ୍ଭ କରିଛି । ସୂଚନା ଥାଉକି ଗତ ବର୍ଷ ନଭେମ୍ବର ୨୯ ତାରିଖ ଦିନ ସମାନ ସ୍ଥାନରୁ ଜଣେ ମହିଳାଙ୍କ ଠାରୁ ଲୁଟେରା ମାନେ ଦୁଇ ଲକ୍ଷ ଟଙ୍କାରୁ ଉର୍ଦ୍ଧ ମୂଲ୍ୟର ସୁନା ଅଳଙ୍କାର ଥିବା ଏକ ଭ୍ୟାନିଟି ବ୍ୟାଗ ମଧ୍ୟ ଲୁଟି ନେଇଥିଲେ । ତେବେ ସ୍ପଷ୍ଟ ଦିବାଲୋକରେ ଲୁଟେରା ମାନେ ବେଫିକର ଲୁଟ କରୁଥିବା ବେଳେ ପୋଲିସ ପାଟ୍ରୋଲିଂ ବୃଦ୍ଧି ପାଇଁ ସାଧାରଣରେ ଦାବି ହେଉଛି ।
