ଧଳାପଥର ( ଆୱାଜ ମିଡ଼ିଆ ) – ଗଙ୍ଗାଧର ସାହୁ : ଧଳାପଥର ଗ୍ରାମର ଆଦର୍ଶ ଶିକ୍ଷକ ସ୍ୱର୍ଗତ ରଘୁନାଥ ସାହୁଙ୍କ ସ୍ମୃତିରେ ଏକ ଶ୍ରଦ୍ଧାଞ୍ଜଳୀ ସଭା ଆୟୋଜିତ ହୋଇଯାଇଛି . କାର୍ଯ୍ୟକ୍ରମ ପ୍ରାରମ୍ଭରେ ଅବସରପ୍ରାପ୍ତ ସଂସ୍କୃତ ଶିକ୍ଷକ ତଥା ରଘୁ ସାରଙ୍କ ସହକର୍ମୀ ଭୀମସେନ ଡ଼ାଳୁଆ ଶ୍ଳୋକ ଉଚ୍ଚାରଣ କରି ସ୍ୱର୍ଗୀୟ ଆତ୍ମାର ସଦଗତି କାମନା କରିଥିଲେ . ଶିକ୍ଷକ ରାଜକିଶୋର ସାହୁଙ୍କ ଦ୍ୱାରା ପରିଚାଳିତ ଏହି ସଭାରେ ସ୍ଥାନୀୟ ଅଞ୍ଚଳର ବହୁ ଶିକ୍ଷାବିତ , ସାମାଜିକ କର୍ମୀ , ଆଇନଜୀବୀ , ଅବସର ପ୍ରାପ୍ତ ଶିକ୍ଷକ ଉପସ୍ଥିତ ରହି ସ୍ୱର୍ଗତ ସାହୁଙ୍କର ଗୁଣାବଳୀ ବର୍ଣ୍ଣନା କରିଥିଲେ . କଳାପଥର ଉଚ୍ଚ ବିଦ୍ୟାଳୟରେ ଶିକ୍ଷାଦାନ କରି ଅବସର ନେବା ପରେ ସ୍ୱର୍ଗତ ସାହୁ ନିଜ ଧଳାପଥର ସ୍ଥିତ ବାସଭବନରେ ରହୁଥିଲେ . ରଘୁ ସାରଙ୍କର ନିଆରା ଶିକ୍ଷାଦାନ ଶୈଳୀ ସମ୍ପର୍କରେ କହିବା ବେଳେ ବହୁ ଛାତ୍ର ଭାବ ବିହ୍ଵଳିତ ହୋଇ ପଡ଼ିଥିଲେ . ବ୍ୟବହାରରେ ଅତ୍ୟନ୍ତ ନମ୍ର କିନ୍ତୁ ଅନୁଶାସନରେ ଖୁବ ଦୃଢ ଥିଲେ ପରଲୋକଗାମୀ ଶିକ୍ଷକ ରଘୁନାଥ ସାହୁ . ନିଜର ଶିକ୍ଷକତା ଜୀବନରେ ସହକର୍ମୀ ମାନଙ୍କ ସହ ଅତ୍ୟନ୍ତ ଭଲ ସମ୍ପର୍କ ରହିଥିବା ସମୟରେ ଛାତ୍ରଛାତ୍ରୀ ମାନଙ୍କୁ ଖୁବ ସ୍ନେହ କରୁଥିଲେ . ତାଙ୍କର ନିଧନ ଖବର ଶୁଣି ଦୂର ଦୂରାନ୍ତରେ ଥିବା ଛାତ୍ରଛାତ୍ରୀ ମାନେ କଳାପଥର ଉଚ୍ଚ ବିଦ୍ୟାଳୟ ସମ୍ପର୍କିତ ସାମାଜିକ ଗଣମାଧ୍ୟମ ପୃଷ୍ଠାରେ ନିଜର ଶୋକ ବ୍ୟକ୍ତ କରିଛନ୍ତି .
