ନୟାଗଡ ( ଆୱାଜ ମିଡ଼ିଆ ) – କିଶୋର ମହାପାତ୍ର : ଜାତୀୟ ରାଜପଥରେ ଦ୍ରୁତ ବେଗରେ ଯାଉଥିବା ମଦ ମାଫିଆଙ୍କ ଗାଡିକୁ ଗୋଡ଼ାଇ ଗୋଡ଼ାଇ ଧରିଲେ ଫାଣ୍ଡି ଅଧିକାରୀ । ଘଟଣାଟି ନୟାଗଡ ଜିଲ୍ଲା ରଣପୁର ଥାନା ରାଜସୁନାଖଳା ଫାଣ୍ଡି ଅନ୍ତର୍ଗତ ଖୋର୍ଦ୍ଧା -ବଲାଙ୍ଗୀର ୫୭ ନମ୍ବର ଜାତୀୟ ରାଜପଥ ର ରାଜ ସୁନାଖଳାରେ ଅଞ୍ଚଳରେ । ସନ୍ଧ୍ୟା ୬ଟାରେ ଏକ ଧଳା ରଙ୍ଗର ଇଣ୍ଡିକା ଭି -2 (OR02BW5088) ନମ୍ବର ବିଶିଷ୍ଟ ଗାଡି ନୟାଗଡ ଅଭିମୁଖେ ଦ୍ରୁତ ଗତିରେ ପଳାଇ ଯାଉଥିବା ବେଳେ କୌଣସି ସୁତ୍ରରୁ ଖବର ପାଇ ରାଜସୁନାଖଳା ଭାରପ୍ରାପ୍ତ ଫାଣ୍ଡି ଅଧିକାରୀ ସବ ଇନସିପେକ୍ଟର ଭୀମସେନ ମଲିକ, କନେଷ୍ଟବଳ ଦୀନବନ୍ଧୁ ମହାନ୍ତି ଓ ଏ.ପି.ଏଫ ନରେନ୍ଦ୍ର ମୁଟିକା, ହୋମଗାର୍ଡ ଆଲୋକ ପାଙ୍ଗାରି ସଦଳ ବଳେ ଗାଡ଼ିଟିକୁ ପିଛା କରିଥିଲେ ।
ପୋଲିସକୁ ଦେଖି ଉକ୍ତ ଇଣ୍ଡିକା କାରଟି ଦ୍ରୁତ ଗତିରେ ବିପଦପୂର୍ଣ୍ଣ ଭାବରେ ଖସି ପଳାଇଯିବାକୁ ଉଦ୍ୟମ କରୁଥିଲା l ମାତ୍ର ଫାଣ୍ଡି ଅଧିକାରୀ ମଲ୍ଲିକ ଉପସ୍ଥିତ ବୁଦ୍ଧି ଖଟାଇ ପୋଲିସ ଭ୍ୟାନକୁ ଉକ୍ତ ଗାଡି ଆଗରେ ରଖି ମଦ ମାଫିଆ ବୋଲଗଡ ତଳସାହିର ତୁଷାର ବେହେରା (20) କାବୁ କରିଥିଲେ । ମାତ୍ର ତୁଷାରଙ୍କ ସହ ଥିବା ଅନ୍ୟ ଅଭିଯୁକ୍ତ ମାନେ ପୋଲିସକୁ ଆକ୍ରମଣ କରିବା ସହ ଜଣେ ସ୍ଥାନୀୟ ସାହସୀ ଯୁବକ ବଳରାମ ରଣାଙ୍କୁ ଆକ୍ରମଣ କରି ଗୁରୁତର କରିଥିଲେ । ତେଵେ ଆହତ ଯୁବକ ଜଣକ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି । ଗିରଫ ଅଭିଯୁକ୍ତଙ୍କ ଗାଡ଼ିରୁ ୬ ପେଟି ମହାରାଣୀ ବିୟର, ବିଦେଶୀ ମଦ ୧ ପେଟି ସହିତ ୨୦ ଲିଟର ରୁ ଉର୍ଦ୍ଧ ଚୋରା ଦେଶୀମଦ ଜବତ ହୋଇଛି , ଇଣ୍ଡିକା ଗାଡିଟିକୁ ଫାଣ୍ଡି ରେ ଅଟକ ରହିଛି ପୁଲିସ । ଅବକାରୀ ବିଭାଗ ନିଷ୍କ୍ରିୟ ଥିବା ବେଳେ ଫାଣ୍ଡି ଅଧିକାରୀଙ୍କ ଏହି ଦୁଃଶାହସିକ କାର୍ଯ୍ୟ ପାଇଁ ସବୁ ମହଲରୁ ପ୍ରଶଂସାର ସୁଅ ଛୁଟୁଛି ।
