କଟକ ( ଆୱାଜ ମିଡ଼ିଆ ) – ଅମ୍ରିତା ପଟ୍ଟନାୟକ : କଟକ କଲେଜ ଛକ ଟ୍ୟାକ୍ସିଷ୍ଟାଣ୍ଡରୁ କାର ଭଡା ନେବା ପରେ ଗାଡି ଚାଳକଙ୍କ ମୃତ ଦେହ ମିଳିବା ଘଟଣାରେ ପୋଲିସର ତଦନ୍ତ ଜାରି ରହିଛି । କଟକ ଜିଲ୍ଲା ନିଆଳି ଗୋବିନ୍ଦପୁର ଅଞ୍ଚଳରୁ କାର ଟି ମିଳିଥିବା ପୋଲିସ ପକ୍ଷରୁ ସୂଚନା ମିଳିଛି । ଗୋବିନ୍ଦପୁର ନଦୀ ବନ୍ଧ କଡ଼ରୁ ମିଳିଛି ଏହି ସୁଇଫ୍ଟ ଡିଜାୟାର କାର । ଗାଡି କେବେ ଓ କିପରି ଏଠାକୁ ଆସିଲା ତଦନ୍ତ କରୁଛି ପୋଲିସ । ତିନି ଯୁବକ ଯୁବତୀଙ୍କ ସମ୍ପର୍କରେ ଖୋଲତାଡ଼ କରୁଛି ଘଷିପୁରା ଥାନା ପୋଲିସ । ଗୋବିନ୍ଦପୁର ଅଞ୍ଚଳରେ ମଧ୍ୟ ତନାଘନା ଚଳାଇଛି ପୋଲିସ । ମୃତକ ଗାଡି ଚାଳକ ଜଣକ ଜଣେ ଅତି ଭଲ ମଣିଷ ଥିଲେ ବୋଲି କାର ମାଲିକ କହିଛନ୍ତି । ତାଙ୍କୁ ହତ୍ୟା କରାଯାଇଥିବା ସନ୍ଦେହ କରିଛନ୍ତି କାର ମାଲିକ । କାରଟି ରାଉଲକେଲା ପର୍ଯ୍ୟନ୍ତ ଯାଇଥିବା ସେ ନିଜ ସୂତ୍ରରୁ ଜାଣିବାକୁ ପାଇଛନ୍ତି ବୋଲି ପ୍ରତିକ୍ରିୟା ରଖିଛନ୍ତି ।
ଗତ 24 ତାରିଖରେ କଟକ କଲେଜ ଛକ ଟ୍ୟାକ୍ସି ଷ୍ଟାଣ୍ଡରୁ ଡ୍ରାଇଭର ଭଗବାନ ବୈରିଗଞ୍ଜନଙ୍କୁ ,ଦୁଇ ଯୁବକ ଓ ଜଣେ ଯୁବତୀ କାର ଭଡାରେ ନେଇ ଯାଜପୁର ଯାଇଥିଲେ । ପରବର୍ତ୍ତୀ ସମୟରେ 27 ତାରିଖ ଦିନ ଘଷିପୁରା ଅଂଚଳରେ ଡ୍ରାଇଭରଙ୍କର ଗଳିତ ମୃତ ଦେହ ମିଳିଥିଲା । କଟକ କଲେଜ ଛକ ଟ୍ୟାକ୍ସି ଷ୍ଟାଣ୍ଡରୁ କାର ଭଡା ନେଇ ଯାଜପୁର ଯିବା ପରେ ତା ପରେ ନିଖୋଜ ହୋଇ ଯାଇଥିଲେ ଗାଡି ଚାଳକ । ପୋଲିସର ଖୋଜା ଖୋଜି ପରେ ଆନନ୍ଦପୁର ଉପଖଣ୍ଡ ଘଷିପୁରା ଥାନା ଦରଖଳା ନିକଟରେ ଜାତୀୟ ରାଜପଥ କଡ଼ରୁ ମିଳିଥିଲା ଗାଡି ଚାଳକଙ୍କ ଗଳିତ ମୃତ ଦେହ । ମୃତକ ଜଣକ ପୁରୀ ଜିଲ୍ଲା କଣାସ ଥାନା ଛୋଟିଯୋଡ଼ି ଗାଁର ଭଗବାନ ବୈରୀଗଞ୍ଜନ । ତାଙ୍କ ବୟସ 50 ରୁ ଉର୍ଦ୍ଧ୍ବ ବୋଲି ଜଣାପଡିଛି । ସେ କଟକରେ ରହି ଏକ କାର ଡ୍ରାଇଭର ଭାବରେ ଜୀବିକା ନିର୍ବାହ କରୁଥିଲେ । କେଉଁ ପରିସ୍ଥିତିରେ ଗାଡି ଚାଳକଙ୍କ ମୃତ୍ୟ ଘଟିଲା ସେ ନେଇ ତଦନ୍ତ କରୁଛି ପୋଲିସ । କାର ଟି ନିଖୋଜ ଥିବାରୁ ହତ୍ୟା ସନ୍ଦେହ କରାଯାଉଛି । ଗତ 24 ତାରିଖ ସନ୍ଧ୍ୟା ସାଢ଼େ ଆଠଟା ପାଖାପାଖି, କଟକ କଲେଜ ଛକରୁ ଦୁଇ ଜଣ ପୁଅ ଓ ଜଣେ ଝିଅ ଯାଜପୁର ଯିବା ପାଇଁ କହି କାର ଭଡ଼ା ନେଇ ଆସିଥିଲେ । ତା ପରଠାରୁ ଭଗବାନଙ୍କ ପତ୍ତା ମିଳି ନଥିଲା । ଗାଡି ଚାଳକ ଜଣକ ନ ଫେରିବାରୁ କାର ମାଲିକ କଟକ ମାଲଗୋଦାମ ଥାନାରେ ଏକ ମିଶିଙ୍ଗ ରିପୋର୍ଟ ଦାଖଲ କରିଥିଲେ । ଏହାକୁ ଆଧାର କରି ପୋଲିସ ଖୋଜାଖୋଜି ଆରମ୍ଭ କରିଥିଲା । ଟାଙ୍ଗୀ ଟୋଲ ଗେଟ ଦେଇ କାରଟି 24 ତାରିଖ ରାତି 9 ଟା 7 ମିନିଟ ସମୟରେ ଯାଇଥିବା ପୋଲିସ ଜାଣିବାକୁ ପାଇଥିଲେ। 24 ତାରିଖ ରାତି 10 ଟା ପାଖାପାଖି ମୃତ ଡ୍ରାଇଭରଙ୍କୁ କଟକ ଟାକ୍ସି ଷ୍ଟାଣ୍ଡରୁ ଅନ୍ୟ ଜଣେ ଡ୍ରାଇଭର ଫୋନ କରିଥିଲେ । ସେ ଯାଜପୁର ରୋଡ଼ ରେ ପହଞ୍ଚିଥିବା ଜଣାଇଥିଲେ ବୋଲି ପୋଲିସ ସୂଚନା ଦେଇଛି । ତାଙ୍କ ମୋବାଇଲ ନମ୍ବରକୁ ଟ୍ରାକ କରିବା ପରେ ଏହା କେନ୍ଦୁଝର ଜିଲ୍ଲାରେ ଥିବା ଜାଣିବାକୁ ପାଇଥିଲା ପୋଲିସ । 25 ତାରିଖ ଦିନ ତାଙ୍କ ମୋବାଇଲ ସୁଇଚ ଅଫ ଥିବା ଜଣାପଡିଥିଲା । କଲେଜ ଛକ ଟ୍ୟାକ୍ସି ଷ୍ଟାଣ୍ଡ ଆଖ ପାଖ ଅଞ୍ଚଳର ସିସି ଟିଭି ଯାଞ୍ଚ କରୁଛି ପୋଲିସ । ଦୁଇ ଯୁବକ ଓ ଯୁବତୀ ଜଣକ କିଏ ସେ ନେଇ ଖୋଳତାଡ଼ କରୁଛି ପୋଲିସ । ଗାଡି ଚାଳକ ଜଣକ ଯାଜପୁର ରୋଡ଼ରୁ ଘଷିପୁରା କେତେବେଳେ ଗଲେ, କାହିଁକି ଗଲେ, ଏକୁଟିଆ ଗଲେ ନା ସାଙ୍ଗରେ ଆଉ କେହିଥିଲେ, ତିନି ଯୁବକ ଯୁବତୀଙ୍କୁ କେଉଁଠି ଛାଡିଲେ, ନା ସେମାନଙ୍କ ସହ ଘଷିପୁରା ଗଲେ, କାରଟି ଏବେ କେଉଁଠି ଅଛି ଏ ସମସ୍ତ ଦିଗକୁ ନେଇ ତଦନ୍ତ କରୁଛି ଘଷିପୁରା ଥାନା ପୋଲିସ ।
