ବାଙ୍କୀ ( ଆୱାଜ ମିଡ଼ିଆ ) – ବ୍ୟୁରୋ ରିପୋର୍ଟ : ବାଙ୍କୀର ବହୁ ଚର୍ଚ୍ଚିତ ଡବଲ ମର୍ଡର କେଶରେ ଦୀର୍ଘ ଦିନର ନୀରବତା ପରେ ପୁଣି ଚଳଚଞ୍ଚକ ହୋଇ ଉଠିଛି ପୁଲିସ .ହତ୍ୟାକାଣ୍ଡ ଘଟଣାରେ ସମ୍ପୃକ୍ତ ଆଉ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇଥିବାର ସୂଚନା ମିଳିଛି . ହତ୍ୟା ଘଟଣାର ଅନ୍ୟତମ ଷଡ଼ଯନ୍ତ୍ରକାରୀ ତଥା ବହୁ ଅପରାଧିକ ମାମଲାରେ ଜଡିତ ପ୍ରଭାତ ସିଂହକୁ ବରଗଡ଼ ଜିଲ୍ଲା ବରଗଡ଼ ଅଞ୍ଚଳରୁ ଏବଂ ଆଉ ଜଣେ ଅଭିଯୁକ୍ତ ବିରଞ୍ଚି ପ୍ରଧାନକୁ କଟକ ଜିଲ୍ଲା ଟାଙ୍ଗୀ ଅଞ୍ଚଳରୁ ଗିରଫ କରାଯାଇଛି . ରାଜନୈତିକ ଶତ୍ରୁତାକୁ ଆଧାର କରି ବାଙ୍କୀ ନିର୍ବାଚନ ମଣ୍ଡଳୀ ଖଜୁରୀପଦା ଗ୍ରାମର ସାମାଜିକ କର୍ମୀ ଭଗବାନ ସ୍ୱାଇଁ ଏବଂ ସାମ୍ବାଦିକ ଆଦିତ୍ୟ କୁମାର ରଣସିଂହଙ୍କୁ ସ୍ପଷ୍ଟ ଦିବାଲୋକରେ ହତ୍ୟା କରାଯାଇଥିଲା . ବାଙ୍କୀ ଉପଖଣ୍ଡ ଆରକ୍ଷୀ ଅଧିକାରୀ କେଶର ତଦନ୍ତ ଭାର ନେବା ପରେ ଦୁଇମାସ ମଧ୍ୟରେ ବାର ଜଣ ଅଭିଯୁକ୍ତଙ୍କୁ ଗିରଫ କରିଥିଲେ . ତେବେ ଏ ମଧ୍ୟରେ ଛ ‘ମାସରୁ ଅଧିକ ସମୟ ଅତିବାହିତ ହୋଇଥିଲେବି ମୁଖ୍ୟ ଅଭିଯୁକ୍ତ କୁହାଯାଉଥିବା ପାଣ୍ଡବ ପ୍ରଧାନ ଏବେ ସୁଦ୍ଧା ଫେରାର ଅଛି . ମାମଲାର ଚାର୍ଜସିଟ ଦାଖଲ ପରେ ବାଙ୍କୀ ଉପଖଣ୍ଡ ଆରକ୍ଷୀ ଅଧିକାରୀ ଏବଂ ବୈଦେଶ୍ଵର ଥାନା ଭାରପ୍ରାପ୍ତ ଅଧିକାରୀଙ୍କର ବଦଳି ହେବା କାରଣରୁ ତଥା କୋଭିଡ କଟକଣା ଓ କାର୍ଯ୍ୟଭାର ଯୋଗୁଁ କେଶରେ ଗିରଫଦାରୀ ପ୍ରକ୍ରିୟା ବନ୍ଦ ରହିଥିଲା . ଘଟଣାରେ ସମ୍ପୃକ୍ତ ଅନ୍ୟ ଅଭିଯୁକ୍ତ ମାନଙ୍କୁ ଖୁବ ଶୀଘ୍ର ଗିରଫ କରାଯିବ ବୋଲି ଉଚ୍ଚ ଅଧିକାରୀ ପ୍ରକାଶ କରିଛନ୍ତି . ତେବେ ଅଭିଯୁକ୍ତ ମାନଙ୍କର ରାଜନୈତିକ ଲିଙ୍କକୁ ନେଇ ଏପର୍ଯ୍ୟନ୍ତ ତଦନ୍ତ କରାଯାଇ ନଥିବାରୁ ଖଜୁରୀପଦା ଗ୍ରାମରେ ଅସନ୍ତୋଷ ବଢ଼ିବାରେ ଲାଗିଛି .
