ନୟାଗଡ ( ଆୱାଜ ମିଡ଼ିଆ ) – କିଶୋର ମହାପାତ୍ର : ଲଗାତାର ଦ୍ୱିତୀୟ ବର୍ଷ ପାଇଁ କୋଭିଡ ନିୟମ କୁ ଦୃଷ୍ଟିରେ ରଖି ନୟାଗଡ଼ ଜଗନ୍ନାଥ ମନ୍ଦିର ଭିତରେ ପାଳନ ହୋଇଛି ମହାପ୍ରଭୁ ଶ୍ରୀଜଗନ୍ନାଥଙ୍କ ରଥଯାତ୍ରା । ପ୍ରତିବର୍ଷ ଯେପରି ମାଉସୀ ମା ଘରେ ପ୍ରଭୁଙ୍କ ନୀତି କାନ୍ତି ସମ୍ପନ୍ନ ହୁଏ ସେହିପରି ନାଟ୍ୟ ମଣ୍ଡପରେ ଚତୁର୍ଦ୍ଧାମୂର୍ତ୍ତିଙ୍କ ସମସ୍ତ ବେଶଭୂଷା ସହିତ ନୀତି କାନ୍ତି ସମ୍ପନ୍ନ ହେବ ବୋଲି ଦେବୋତ୍ତର ବିଭାଗ ମ୍ୟାନେଜର ପ୍ରକାଶ କରିଛନ୍ତି । ମହାମାରୀ କରୋନା ସଂକ୍ରମଣ ପରିସ୍ଥିତିରେ କେବଳ ପୁରୀରେ ରଥଟଣା ପାଇଁ ନିଷ୍ପତ୍ତି ହୋଇଥିବା ସମୟରେ ଅନ୍ୟ ସବୁ ସ୍ଥାନରେ କେବଳ ନୀତିକାନ୍ତିରେ ମହାପ୍ରଭୁଙ୍କ ରଥଯାତ୍ରା ପାଳନ ପାଇଁ ନିଷ୍ପତ୍ତି ହୋଇଥିଲା । ନୟାଗଡ ପୁରୁଣା ସହରରେ ଅବସ୍ଥିତ ଶ୍ରୀ ଜଗନ୍ନାଥ ମନ୍ଦିର ଭିତରେ ସେବାୟତ ଏବଂ ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ମହାପ୍ରଭୁଙ୍କର ଘୋଷଯାତ୍ରା ପର୍ବ ଆରମ୍ଭ ହୋଇଛି ।
