କଟକ ( ଆୱାଜ ମିଡ଼ିଆ ) – ଦିଲ୍ଲୀପ ପତି : କୁହାଯାଏ ପ୍ରତିଭା କାହାର ଅପେକ୍ଷା କରେ ନାହିଁ, ବରଂ ସଠିକ୍ ସମୟ ଓ ସୁଯୋଗ ପାଇଲେ ନିଜର ପରିଚୟ ସୃଷ୍ଟି କରେ । ଏହାର ଏକ ଜ୍ୱଳନ୍ତ ଉଦାହରଣ ହେଉଛନ୍ତି କଟକ ଜିଲ୍ଲା ନିଆଳି ବ୍ଲକ୍ର ସଡ଼ାସଂ ଗ୍ରାମର ଝିଅ ସାନିଆ ସ୍ମୃତି ମହାନ୍ତି । ବହୁତ କମ୍ ବୟସରେ ନିଜର ଅଦ୍ଭୁତ କଳାତ୍ମକ ଦକ୍ଷତା ପ୍ରଦର୍ଶନ କରି ସେ ଏବେ ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି । ଚିତ୍ରାଙ୍କନ ଓ କବିତାରେ ନିପୁଣ ସାନିଆ ଉଦୟନାଥ ମହାବିଦ୍ୟାଳୟର ଜଣେ ମେଧାବୀ ଛାତ୍ରୀ ଭାବେ ଅଧ୍ୟୟନରତ , ପାଠପଢ଼ା ସହିତ ସୃଜନଶୀଳ କାମରେ ମଧ୍ୟ ବେଶ୍ ପାରଙ୍ଗମ । ତାଙ୍କର ଚିତ୍ରାଙ୍କନ ଶୈଳୀ ଅତ୍ୟନ୍ତ ଆକର୍ଷଣୀୟ, ଯାହା ଦର୍ଶକଙ୍କ ମନ ମୋହିନେବ । କେବଳ ତୂଳୀରେ କାଗଜ ଉପରେ କଳା ସୃଷ୍ଟି କରିବା ନୁହେଁ, ବରଂ କଲମ ମାଧ୍ୟମରେ ଭାବର ଅଭିବ୍ୟକ୍ତି କରିବାରେ ମଧ୍ୟ ସେ ସିଦ୍ଧହସ୍ତ । ତାଙ୍କ ଲେଖନୀରୁ କ୍ଷରିତ କବିତାଗୁଡ଼ିକ ଗଭୀର ଚିନ୍ତନ ଓ ସମ୍ବେଦନଶୀଳତାର ପରିଚୟ ଦିଅନ୍ତି । ସାନିଆଙ୍କର ଏହି ଦୁଇଟି ଗୁଣ ତାଙ୍କୁ ସାଧାରଣ ଛାତ୍ରୀଙ୍କଠାରୁ ଅଲଗା କରିଛି । କମ୍ ବୟସରେ ଏଭଳି ସଫଳତା ପାଇଁ ସେ ନିଜ ପରିବାର ଓ ଶିକ୍ଷକମାନଙ୍କୁ ଶ୍ରେୟ ଦେଇଛନ୍ତି । ନିଜର ଏହି କଳାକୁ ସେ ଆଗାମୀ ଦିନରେ ଅଧିକ ସମୃଦ୍ଧ କରିବା ପାଇଁ ପ୍ରୟାସ ଜାରି ରଖିଛନ୍ତି । ତାଙ୍କର ଏହି ସଫଳତା ନିଆଳି ଅଞ୍ଚଳ ପାଇଁ ଗର୍ବ ଓ ଗୌରବର ବିଷୟ । ସାନିଆଙ୍କ ଭବିଷ୍ୟତ ଉଜ୍ଜ୍ୱଳ ହେଉ ଏବଂ ସେ କଳା ଓ ସାହିତ୍ୟ ଜଗତରେ ଆହୁରି ଅନେକ ସଫଳତା ହାସଲ କରନ୍ତୁ, ଏହାହିଁ ସାଧାରଣରେ କାମନା କରାଯାଉଛି ।
କଳା ଓ ସାହିତ୍ୟର ଅପୂର୍ବ ସମନ୍ୱୟ : କଟକର ଉଦୀୟମାନ ପ୍ରତିଭା ସାନିଆ ସ୍ମୃତି ମହାନ୍ତି !!!
