ଷ୍ଟ୍ରିଟ ଲାଇଟ ସ୍ଥାପନ ରେ ସରକାରୀ ଅର୍ଥ ହରିଲୁଟ : ଦୁର୍ନୀତିର ଭିଜିଲାନ୍ସ ର ତଦନ୍ତ ଆରମ୍ଭ !!!

ନୟାଗଡ ( ଆୱାଜ ମିଡ଼ିଆ ) – ସ୍ୱରୂପ ପଟ୍ଟନାୟକ : ୨୦୨୧- ୨୩ ମସିହାରେ ଏଲଇଡି ଷ୍ଟ୍ରିଟ୍ ଲାଇଟ୍ ସ୍ଥାପନ କାର୍ଯ୍ୟରେ ସରକାରୀ ଅର୍ଥର ଦୁର୍ନୀତି ଓ ଆତ୍ମସାତ୍ । କେନ୍ଦୁଝର, ନୟାଗଡ଼ ଓ ଯାଜପୁର ଜିଲ୍ଲାରେ ୨୪ ଟି ଟିମ୍ ଦ୍ୱାରା ଓଡ଼ିଶା ଭିଜିଲାନ୍ସର ତଦନ୍ତ ଆରମ୍ଭ । କେନ୍ଦୁଝର, ନୟାଗଡ଼ ଏବଂ ଯାଜପୁର ଜିଲ୍ଲାର ବିଭିନ୍ନ ଗ୍ରାମ ପଞ୍ଚାୟତରେ ୨୦୨୧-୨୨ ଓ ୨୦୨୨-୨୩ ମସିହାରେ ଏଲଇଡି ଷ୍ଟ୍ରିଟ୍ ଲାଇଟ୍ ସ୍ଥାପନ କାର୍ଯ୍ୟରେ ସରକାରୀ ଅର୍ଥର ଦୁର୍ନୀତି ଓ ଆତ୍ମସାତ୍ ସମ୍ବନ୍ଧୀୟ ବିଶ୍ୱସନୀୟ ସୂଚନା ଆଧାରରେ ଓଡ଼ିଶା ଭିଜିଲାନ୍ସ ପକ୍ଷରୁ ବ୍ୟାପକ ତଦନ୍ତ ଆରମ୍ଭ କରାଯାଇଛି। ଶୀଘ୍ର ଏବଂ ସମନ୍ୱିତ କାର୍ଯ୍ୟାନୁଷ୍ଠାନ ପାଇଁ ୮୧ ଜଣ ଅଧିକାରୀ (ଅତିରିକ୍ତ ଏସପି, ଡିଏସପି, ଇନ୍ସପେକ୍ଟର ଓ ଅନ୍ୟମାନେ) ସମ୍ମିଳିତ ୨୪ଟି ଟିମ୍ ଗଠନ କରାଯାଇଛି। ତିନୋଟି ଜିଲ୍ଲାରେ ପ୍ରତ୍ୟେକରେ ୨୭ ଜଣ ଅଧିକାରୀ ନିଯୁକ୍ତ ହୋଇଛନ୍ତି । କ୍ଷେତ୍ର ସ୍ତରୀୟ ତଦନ୍ତରେ ଜଣାପଡ଼ିଛି ଯେ, ରାଜ୍ୟ ଅର୍ଥ କମିଶନ (୫ମ ଏସଏଫସି) ଅନୁଦାନ ଅଧୀନରେ ପ୍ରତ୍ୟେକ ଗ୍ରାମ ପଞ୍ଚାୟତର ଗୋଟିଏ ଗ୍ରାମରେ ସମ୍ପୂର୍ଣ୍ଣ ବାର୍ଷିକ ରକ୍ଷଣାବେକ୍ଷଣ ଚୁକ୍ତି ସହିତ ଟର୍ନକି ଆଧାରରେ ଏଲଇଡି ଷ୍ଟ୍ରିଟ୍ ଲାଇଟ୍ ବ୍ୟବସ୍ଥା ସ୍ଥାପନ ପ୍ରକଳ୍ପ ଆରମ୍ଭ କରାଯାଇଥିଲା । ତଦନ୍ତରେ ଟେଣ୍ଡର ନିୟମାବଳୀର ଗୁରୁତର ଉଲ୍ଲଂଘନ ଏବଂ ବ୍ୟାପକ ଅନିୟମିତତା ପ୍ରକାଶ ପାଇଛି। ଏଥିରେ ଶକ୍ତି ମିଟର, ୫୦୦ ମିଟର କେବୁଲ, ଏମସିସିବି (MCCB), ଆଇ ହୁକ୍, ସସ୍ପେନ୍ସନ କ୍ଲାମ୍ପ, ଡେଡ୍ ଏଣ୍ଡ କ୍ଲାମ୍ପ, ଫଟୋ ସ୍ୱିଚ୍ ଟାଇମର ଇତ୍ୟାଦି ଅତ୍ୟାବଶ୍ୟକ ଉପକରଣ (୧୦ଟି ଏଲଇଡି ଲାଇଟ୍ ବିଶିଷ୍ଟ ପ୍ରତ୍ୟେକ କ୍ଲଷ୍ଟର ପାଇଁ) ସ୍ଥାପନ ନକରି ସେଗୁଡ଼ିକ ସ୍ଥାପନ କରାଯାଇଥିବା ଦର୍ଶାଇ ବିଲ୍ ଉଠାଇବା ଏବଂ ସରକାରୀ ଅର୍ଥ ଆତ୍ମସାତ୍ କରିବା ଭଳି ଅଭିଯୋଗ ସାମ୍ନାକୁ ଆସିଛି । ସରକାରୀ ଅର୍ଥର ଆତ୍ମସାତ୍ ପରିମାଣ ଆକଳନ କରିବା ସହିତ ଏହି ପ୍ରକଳ୍ପରେ ସରକାରୀ ଅଧିକାରୀ ଓ କାର୍ଯ୍ୟନିଷ୍ପାଦନକାରୀ ସଂସ୍ଥାମାନଙ୍କ ସମ୍ପୃକ୍ତତା ନିର୍ଣ୍ଣୟ ପାଇଁ ଆଜି ଏହି ତିନି ଜିଲ୍ଲାର ୫୦ଟି ସ୍ଥାନରେ ସ୍ଥଳ ପର୍ଯ୍ୟାୟରେ ବୈଷୟିକ ତଦନ୍ତ ଓ ନିରୀକ୍ଷଣ କରାଯାଉଛି । ଅଧିକ ତଦନ୍ତ ରିପୋର୍ଟ ପରେ ପ୍ରକାଶ କରାଯିବ ।